Վրաստանի վարչապետ Իրակլի Ղարիբաշվիլին աբխազներին և օսերին առաջարկել է ինքնավարություն միացյալ Վրաստանի կազմում: Այս մասին հոկտեմբերի 27-ին բրիֆինգի ընթացքում իշխող «Վրացական երազանք» կոալիցիայի 2 տարվա արդյունքներն ամփոփելու ժամանակ հայտարարել է վարչապետը:
Վրաստանի վարչապետ Իրակլի Ղարիբաշվիլին
«Մենք ունեցել ենք ինքնավար հանրապետություն ու հիմա այդ նույն ինքնավարությունն առաջարկում ենք բայց միացյալ, ուժեղ Վրաստանի կազմում ու մենք խաղաղ կապրենք: Առանց մեզ դուք երջանիկ չեք լինի, առանց ձեզ էլ՝ մենք: Սա եղբայրական ևս մեկ առաջարկ է»,- ասել է Ղարիբաշվիլին:
Այդ նույն ժամանակ Վրաստանի ընդդիմադիր կուսակցությունը` Ազգային միացյալ շարժումը (2008-2013թթ Վրաստանում իշխող կուսակցությունն էր,նախագահը Միխայիլ Սահակաշվիլին էր), հանձին ներկայացուցիչ Գիգի Բոկերիայի հայտարարում է, որ Վրաստանի իշխանությունները սխալ քաղաքականություն են վարում «օկուպացված» տարածքների առնչությամբ: Եվ այն ինչ ասել է Ղարիբաշվիլին ինչ-որ հիշողություններ են:
«Ապագայի ոչ մի տեսլական, ՌԴ-ից եկող մարտահրավերների ոչ մի գիտակցում: Եվս մեկ անգամ ապացուցվեց, որ սա Իվանիշվիլիի խումբն է, որ չի գիտակցում, թե ինչ խնդիրների առաջ է կանգնած Վրաստանը»,- ասել է Գիգի Բոկերիան:
Հավելենք, որ Վրաստանի ներկայիս վարչապետը 20 տոկոս տարածքային կորստի համար մեղադրում է Սահակաշվիլիին և նրա համախոհներին: Իսկ վերջինս բազմիցս նշել է, որ Վրաստանն այդ տարածքները կորցրել է ոչ թե մի քանի տարի, այլ ավելի քան 20 տարի առաջ:
Անվտանգության հարցերով փորձագետ Խաթունի Լագազիձեն էլ կարծում է, որ Վրաստանի վարչապետը որևէ նոր բան չի ասել Աբխազիայի և Հարավայի Օսիայի վերաբերյալ։
«Բայց և այնպես, ՌԴ-Աբխազիա հարաբերություններում և համագործակցության նոր համաձայնագրի քննարկման փուլում վարչապետի բարյացակամ տոնը կարևոր է եղել»,- ասել է Լագազիձեն։
Նշենք, որ 2008 թվականին Ռուսաստանը ճանաչեց Աբխազիայի և Հարավային Օսիայի անկախությունը, որոնք Վրաստանի կազմում երկար ժամանակ անկախության էին ձգտում: