Թուրքիայում բախումների պատճառով զոհերի թիվը հասել է 32-ի

Հոկտեմբերի 9–10-ը Թուրքիայում շարունակվող բողոքի ցույցերի ու բախումների պատճառով զոհվել է ևս 10 մարդ, որոնցից երկուսը՝ ոստիկան , հայտնում է ռուսաստանյան «ՌԻԱ Նովոստի» գործակալությունը:

Թուրքիայում բախումներ են ոստիկանների ու ցուցարարների միջև: Ցուցարարները թուրքական իշխանություններից պահանջում են արձագանքել Քոբանիի մարտերին ու օգնել քրդերին

Բախումները շարունակվել են մի շարք քաղաքներում, փոխհրաձգություններ են եղել ոստիկանների ու ցուցարարների միջև: Մասնավորապես Դիարբեքիրում ցուցարարները երկու զենքի խանութ են թալանել, որտեղից գողացել են հրազենի 100-ից ավելի միավոր ու անհայտ քանակությամբ փամփուշտներ:

Բախումներ են եղել Մերսին քաղաքում, Բինգյոլում, որտեղ փոխհրաձգության ժամանակ վիրավորվել է շրջանի ժանդարմերիայի պետը ու ևս երկու ոստիկաններ:

Բողոքող երիտասարդների խմբերը շարունակել են պահանջել, որ Անկարան միջամտի Սիրիայի՝ Թուրքիային սահմանակից քրդաբնակ Քոբանի քաղաքում մղվող մարտերին ու օգնի «Իսլամական պետություն» խմբավորման դեմ կռվող քրդական ջոկատներին:

Ոստիկանության ու ցուցարարների միջև մի քանի օր շարունակվող բախումների արդյունքում արդեն մահացել է 32 մարդ, որոնցից երկուսը ոստիկան, սակայն թուրքական պաշտոնական աղբյուրները դեռևս տեղեկություններ չեն տալիս զոհերի մասին:

Անկարգությունները պայմանավորված են Քոբանիի մարտերի կապակցությամբ Թուրքիայի կրավորական կեցվածքով: Չնայած երկրի քաղաքացիները, մասնավորապես քրդերը պահանջում են, որ Թուրքիայի իշխանություններն օգնեն Քոբանիում «Իսլամական պետություն» ծայրահեղական խմբավորման դեմ կռվող քրդերին։ Սակայն թուրքական իշխանությունները մինչև հիմա հրաժարվում են որևէ կերպ միջամտել մարտերին:

Թուրքիայի հարավ-արևելյան շրջաններում ու խոշոր քաղաքներում մի շարք բողոքի ցույցեր են եղել, որոնք ուղեկցվել են անկարգություններով ու բռնություններով: Ոստիկանների հետ բախումներում ցուցարարներն օգտագործել են մահակներ, քարեր, բռնկվող նյութերով շշեր և այլն, վառել են ավտոբուսներ ու մեքենաներ:

Թուրքիայի՝ տասնյակից ավելի խոշոր քաղաքում անկարգությունները ճնշելու համար թուրքական կառավարությունը պարետային ժամ է հայտարարել Վանում, Մուշում, Դիարբեքիրում, Սիիրիթում (Սղերդ), Մարդինում։ Հայտարարված պարետային ժամը  չի օգնում, ու բախումները շարունակվում են:

Ավելացնենք, որ «Իսլամական պետություն» խմբավորման ծայրահեղական իսլամիստներն արդեն 3-րդ շաբաթն է, ինչ հարձակումներ են գործում Սիրիայի քրդաբնակ Քոբանի քաղաքի վրա։ Քրդերը, որոնց մի մասը նաև Թուրքիայից է, շարունակում են փոփոխակի հաջողոթյուններով մարտեր մղել Քոբանիի համար:

Իսլամիստները սպառազինված են զրահատեխնիկայով, այդ թվում նաև՝ տանկերով, ու հրետանային միջոցներով, որոնք ավելի վաղ առգրավել են Իրաքի կառավարական ուժերից։  Այս պահին «Իսլամական պետություն» ծայրահեղական խմբավորման վերահսկողության տակ են Իրաքի և Սիրիայի հսկայական տարածքներ։