Ռուսաստանյան նավագնացության ծովային ռեգիստրը «Բաքվի նավաշինական գործարան» ԲԲԸ-ից պատվիրել է 38М նախագծի 3 միավոր արագընթաց ուղևորատար կատերներ Ադրբեջանի Կասպյան ծովային նավագնացության ձեռնարկության համար։ Կատերները կիրառվելու են հիմնականում Կասպից ծովում Ադրբեջանին պատկանող հորատման լողացող կայանների վրա բեռներ տեղափոխելու համար։
Ինչպես հաղորդում է ռուսաստանյան Portnews լրատվական գործակալությունը, հղում կատարելով Ռուսաստանյան նավագնացության ծովային ռեգիստրի պաշտոնական կայքի հաղորդագրությանը, կատերների շինարարությունը ծրագրել են սկսել 2014-ի օգոստոսից, պատվիատուին փոխանցվելու են 2016-ի մայիսին։ Աղբյուրը տեղեկություններ է հրապարակել նաև ստեղծվելիք կատերների տեխնիկական տվյալների մասին։ Դրանք պետք է նախատեսված լինեն 80 հոգու փոխադրման համար, երկարությունը պետք է որ լինի 38.22 մ, լայնությունը՝ 8.2 մ, խորությունը՝ 4.3 մ, թաղվածքը՝ 2.25 մ, անձնակազմը՝ 8 հոգի։
Նկատենք, որ կատերների դիզայնով զբաղվելու է սինգապուրյան SHIPTECH ընկերությունը, որը ևս պաշտոնապես հաստատել է տեղեկությունը։
Հետաքրքիր է այն հանգամանքը, որ ադրբեջանական ԱՊԱ լրատվական գործակալությունը ներկայացրել է սույն լուրը՝ «ՌԴ-ն պատվիրել է կատերներ Բաքվի նավաշինարանից» խորագրով, մինչդեռ, ինչպես արդեն շեշտեցինք, կատերները կիրառելու է Ադրբեջանի Կասպյան նավագնացության ձեռնարկությունը։ Իրականում Ռուսաստանյան նավագնացության ծովային ռեգիստրը 1913-ից գործող միջազգային որակավորման կազմակերպություն է, գործում է ՌԴ տրանսպորտի նախարարության ներքո, զբաղվում է տեխնիկական հսկողությամբ, իր տրամադրության ներքո ունի 5200 նավ, որոնք գրանցված են աշխարհի ավելի քան 40 երկրների, այդ թվում՝ Ադրբեջանի դրոշի ներքո։ Ռուսաստանյան նավագնացության ծովային ռեգիստրը ճանաչվել է Եվրամիության ու շուրջ 70 երկրների ծովային գերատեսչությունների կողմից։ Ադրբեջանում այս կազմակերպության մասնաճյուղը, համաձայն պաշտոնական տվյալների, գործում է 1923-ից։ Ռուսաստանյան նավագնացության ծովային ռեգիստրը նավթագազային համակարգի բնականոն աշխատանքի կազմակերպման համար տրամադրում է որակի վերահսկման ծառայություններ ողջ գործընթացի տարբեր փուլերում, այդ թվում՝ նավերի ու տանկերների նախագծման փուլում։
Հարկ է ընդգծել, որ վերոհիշյալ կատերների ստեղծման աշխատանքների վերահսկման համար պայմանագիրը ռուսաստանյան կազմակերպությունն Ադրբեջանի պետական նավթային ընկերության (SOCAR) հետ կնքել էր դեռևս 2014-ի փետրվարի վերջին։ Այդ ժամանակ հաղորդվում էր 38M նախագծի 10 միավոր կատերների ստեղծման ծրագրերի մասին։
Հավելենք նաև, որ «Բաքվի նավաշինական գործարանն» Ադրբեջանի ու Սինգապուրի համատեղ կազմակերպություն է։ 2010-ին Ադրբեջանի պետական նավթարդյունաբերական ընկերության (SOCAR) տնօրեն Ռովնագ Աբդուլաևի՝ Սինգապուր կատարած այցի ժամանակ SOCAR-ի, սինգապուրական Keppel Offshore and Marine ընկերության և Ադրբեջանի ներդրումային ընկերության միջև կնքվել է պայմանագիր, որով նախատեսված էր Բաքվում նավաշինական գործարան հիմնել։
Ընդ որում, բաժնետոմսերի 65 տոկոսը SOCAR-ինն է, 25 տոկոսը՝ Ադրբեջանի ներդրումային ընկերությանը, 10 տոկոսը՝ Keppel Offshore and Marine ընկերությանը։ Ավելի վաղ՝ 2009-ի վերջին, կողմերը փոխհամաձայնության հուշագիր էին կնքել։
Նավաշինարանը նախագծել էին բրիտանական Royal Haskoning և նիդեռլանդական TTС ընկերությունները։ SOCAR-ի տվյալներով՝ նավաշինական գործարանի կառուցման համար ընդհանուր առմամբ ծախսվել է 470 մլն ԱՄՆ դոլար։ Գործարանը պաշտոնապես գրանցվել է որպես ԲԲԸ 2011-ի մայիսին, իսկ 2013-ի սեպտեմբերի 20-ին այն սկսել են շահագործել։
Նկատենք նաև, որ 2014-ի ապրիլի 24-ին «Բաքվի նավաշինական գործարան» ԲԲԸ-ն և bp Exploration («Շահդենիզ-2») ԲԲԸ-ն պայմանագիր են կնքել նավթարդյունաբերության շրջանակներում ստորջրյա տեխնիկական աշխատանքներում կիրառվող նավի նախագծման և կառուցման վերաբերյալ։ Այս գործարքը սույն գործարանի կնքած ամենանշանակալից պայմանագիրն է։
Pingback: Ռազմաշաբաթ. Ադրբեջան. հուլիսի 27-օգոստոսի 3 | Ռազմ.info