Ֆրանսիական Thales ընկերությունը Եգիպտոսի հետ բանակցությունների մեջ է, որոնց առարկան վերջինիս ռազմաօդային ուժերի ավիապարկում առկա Միրաժ կործանիչների արդիականացումն է։ Նախնական գնահատականով, կողմերի միջև կարող է կնքվել 1.3-ից 3.4 միլիարդ դոլար ընդհանուր արժողությամբ պայմանագիր։ Այս մասին գրում է ֆրանսիական La Tribune պարբերականը։
Միրաժ-2000 կործանիչներ. Եգիպտոսի ՌՕՈւ
Վերջինիս տվյալներով, Thales ընկերությունը Եգիպտոսի հետ կործանիչների արդիականացման հարցի շուրջ բանակցում է արդեն 2 տարի։ Գործարքի կայացմանը փորձում է խոչընդոտել Իսրայելը, սակայն, չնայած դրան, Ֆրանսիայի կառավարությունը տվել է իր հավանությունը։
Դեռևս ստույգ հայտնի չէ, թե ինչ քանակությամբ կործանիչ և դրանց բաղկացուցիչ որ մասերն են արդիականացվելու, սակայն ֆրանսիական պարբերականի աղբյուրները նշում են, որ խոսքն առնվազն 16 միավոր Միրաժ-2000-ի մասին է, որոնց վրա կտեղադրվի ռադիոտեղորոշիչ նոր կայան, ինչպես նաև արդիականացված բորտ-էլեկտրոնային համակարգ, որը թույլ կտա կիրառել «օդ-օդ» դասի կառավարվող ժամանակակից հրթիռներ։
Նշենք, որ Եգիպտոսի ռազմաօդային ուժերի ավիապարկում առկա է ընդհանուր առմամբ շուրջ 100 միավոր Միրաժ-2000 և Միրաժ-5 կործանիչ։ 1977-1983 թվականներին գնվել է 81 միավոր Միրաժ-5, իսկ 1990-ականների սկզբին՝ Եգիպտոսը դարձավ Միրաժ-2000 կործանիչի օտարերկրյա առաջին գնորդներից մեկը՝ ստանալով դրա 20 օրինակ։
Ֆրանսիական արտադրության Միրաժ-5 բազմաֆունկցիոնալ կործանիչը շահագործման է հանձնվել 1970-ին։ Այն կարող է զարգացնել մինչև 2 350 կմ/ժ առավելագույն արագություն, թռիչքի առաստաղը 18 000 մետր է։ Սպառազինությունում կործանիչն ունի 30 մմ-անոց ավիացիոն երկփող հրանոթ և ամրակցման 7 կետ՝ տարբեր նշանակության ռումբերի ու հրթիռների համար։
Միրաժ-2000 կործանիչը շահագործվում է 1984-ից։ Այն կարող է զարգացնել մինչև 2 200 կմ/ժ առավելագույն արագություն, թռիչքի առաստաղը 16 460 մետր է։ Սպառազինությունում կործանիչն ունի 30 մմ-անոց ավիացիոն երկփող հրանոթ և ամրակցման 9 կետ՝ տարբեր նշանակության ռումբերի ու կոնտեյներների, ինչպես նաև «օդ-օդ» և «օդ-մակերևույթ» դասի հրթիռների համար։