Մի խումբ հոգևորականներ հունիսի 21-ին այցելել են հայ-ադրբեջանական սահմանի հարավարևմտյան հատվածում տեղակայված մարտական հենակետեր:
Հոգևորականները՝ առաջին գծում
Արտերկրում իրենց հոգևոր ծառայությունն իրականացնող սրբազան հայրերն այս օրերին Հայաստանում են Մայր Աթոռ Սուրբ Էջմիածնում երկու տարին մեկ անգամ անցկացվող միաբանների հավաքին մասնակցելու նպատակով: Հավաքին ներգրավված մի խումբ հոգևորականներ զինված ուժերի մարտական հենակետերից մեկն այցելելու ցանկություն էին արտահայտել:
Հայ-ադրբեջանական պետական սահմանի հարավարևմտյան հատվածում տեղակայված մարտական հենակետում Հայ առաքելական եկեղեցու սրբազան հայրերը հանդիպել են տվյալ հատվածի պաշտպանությունն իրականացնող զինծառայողներին:
Մարտական հենակետի ղեկավար կազմը պատասխանել է հոգևորականներին հետաքրքրող հարցերին, ներկայացրել մարտական հերթապահության առանձնահատկություններն ու խնդիրները, առկա սպառազինության տեսակները: Վերջիններս եղել են նաև դիտակետերում, հետևեցին դիրքապահ զինծառայողների գործառույթներին:
Ացելության ավարտին սրբազան հայրերը ճաշակել են զինվորական ուտեստներ, լուսանկարվել հենակետի անձնակազմի հետ: