Իտալիայի ռազմածովային ուժերը սկսել են S-100 Camcompter ուղղաթիռատիպ անօդաչու թռչող սարքի գնահատողական փորձարկումները։ Դրանց ընթացքում փորձարկվելու են ԱԹՍ-ի թռիչքային ու տեխնիկական հնարավորությունները Սան-Ջուսթո դեսանտային նավի վրա։
Ինչպես հաղորդում է Defence-blog.com-ը, Իտալիայի ռազմածովային ուժերը վարձակալել են սույն անօդաչուն սեփական նավերի անձնակազմերին բաց ծովում հետախուզական, շրջադիտման և այլ անհրաժեշտ տվյալներ փոխանցելու նպատակով։ Բացի այդ, ԱԹՍ-ն նախատեսվում է կիրառել որոնողափրկարարական գործողություններում, բնական աղետների ժամանակ, ինչպես և քաղաքացիական նպատակներով։
Նշենք, որ S-100 Camcompter-ն ընդգրկում է 2 սարք, կառավարկան 1 կայան և մի շարք ալեհավաքներ։ Անօդաչուի էլեկտրաօպտիկական ու ինֆրակարմիր հատուկ հաղորդիչները թույլ են տալիս հետախուզություն կատարել նաև նավի դիտակետերից դուրս տարածքներում, առցանց ռեժիմով։
Հավելենք, որ Սան-Ջուսթո նավը ևս Իտալիայի ՌԾՈւ-ն վարձակալել է, և S-100 Camcompter ԱԹՍ կրող իր առաջին դեսանտային նավն է։ Այն ծովում է մնալու մոտ մեկ շաբաթ՝ ԱԹՍ-ի համապատասխան փորձարկումների համար։ Ըստ աղբյուրի՝ ներկա դրությամբ ավարտվել են ԱԹՍ-ի և նավի փոխգործակցության, նաև ԱԹՍ-ի տեսանելիության ու այն հայտնաբերելու հավանականության գնահատողական փորձարկումները, բացի այդ ընթացքի մեջ են տախտակամածից թռիչքի և վայրէջքի հնարավորությունների ստուգումը, ԱԹՍ-ի հաղորդիչների առանձնահատկությունների փորձարկումը։
Նկատենք, որ ԱԹՍ-ի փորձարկումը նավի վրա ունի հեռահար նպատակ, այն է՝ իտալական նավերի արդյունավետության բարձրացում, գործառույթների թվի ավելացում, անվտանգության ապահովում հատկապես ծովային առևտրային ուղիներում հանդիպող ծովահենների հարձակումներից։