Մարտեր ուկրաինական Կրամատորսկ քաղաքի մերձակայքում. ուժայինները կորցրել են զրահատեխնիկա

Դոնեցկի շրջանի Կրամատորսկ քաղաքից մոտ 20 կմ հեռավորության վրա մայիսի 13-ի կեսօրին ակտիվ մարտեր են ծավալվել ուկրաինական ուժային կառույցների և տեղի ինքնապաշտպանական ուժերի միջև։ Այս մասին հայտնում են ռուսաստանյան լրատվամիջոցների՝ դեպքի վայրում աշխատող թղթակիցները։

Ուժայինների կողմից հսկվող անցակետ. արևելյան Ուկրաինա

Ինքնապաշտպանական ուժերը դարանից հարձակվել են Ուկրաինայի զինված ուժերի՝ նախնական տվյալներով 95-րդ աերոմոբիլ բրիգադի ստորաբաժանման շարասյան վրա ու ոչնչացրել զրահապատ փոխադրիչ, ինչպես նաև զինամթերք տեղափոխող 1 բեռնատար։

Զոհերի և զինտեխնիկայի կորստի մասին տվյալներն այս պահին բավական իրարամերժ են։ Նշենք, սակայն, որ գրեթե բոլոր աղբյուրները նշում են՝ երկու կողմից էլ կան զոհեր ու վիրավորներ։

Միջադեպի վերաբերյալ տեղեկություն է տարածել նաև ինքնապաշտպանական ուժերի հրամանատար Իգոր Ստրելկովը։ Վերջինս հայտնել է, որ իրականացված գործողության արդյունքում Ուկրաինայի ուժայինները կորցրել են 2 զրահափոխադրիչ և 2 բեռնատար, որոնցից մեկի թափքում եղել է հետևակ, իսկ մյուսում՝ զինամթերք։ Անդրադառնալով սեփական կորուստներին՝ Ստրելկովը հայտնել է միայն 1 զոհվածի և 1 վիրավորի մասին։

Իր հերթին, Ուկրաինայի պաշտպանության նախարարությունը հանդես է եկել հայտարարությամբ ու հայտնել, որ ինքնապաշտպանական ուժերի հետ բախման հետևանքով զոհվել է զինված ուժերի 6 զինծառայող, ևս 8-ը վիրավոր են։

Ուկրաինայի արևելքում ծավալվող իրադարձություններին օպերատիվ տեղեկանալու համար կարող եք հետևել Ռազմինֆոյի թարմացվող լրահոսին։