Հյուսիսային Կորեայի հետ սահմանին անցկացվող զորավարժության ընթացքում Չինաստանի զինված ուժերը կիրառել են իրենց Type-99 (ZTZ-99) տանկի նորագույն արդիականացումը՝ Type-99G հիմնական մարտական տանկը, որը երկար ժամանակ գաղտնի էր պահվում։
Թեև դեռևս 2008-ից տեղեկություններ էին հայտնվել, որ Չինաստանը նման արդիականացում է նախագծել, սակայն նոր տանկն առաջին անգամ պաշտոնապես ներկայացվեց հենց այս զորավարժության ընթացքում։ Մինչ այդ ինչպես տանկերի գոյությունն, այնպես էլ նրանց մարտավարատեխնիկական բնութագրերը գաղտնի էին պահվում։
Չինաստանի նոր Type-99G հիմնական մարտական տանկը. նկարը armyrecognition.com կայքի
Հայտնի է, որ 55 տոննանոց տանկի վրա տեղադրված է 125 մմ հարթափող թնդանոթ, որը հնարավորություն ունի նաև հրթիռներ արձակել։ Մինչ այս, Չինաստանը ներկայացրել էր տանկի Type-99A1 ու Type-99A2, սակայն դրանց արտադրության կամ սպառազինության ընդունվելու մասին տեղեկություններ չկան։
Type-99-ը Չինական արտադրության հիմնական մարտական տանկերի ընտանիք է, ունի մի քանի արդիականացումներ։ Տանկի անձնակազմը 3 հոգի է, զանգվածը 54-55 տոննա է՝ կախված արդիականացումից։ Զինված է 125 մմ հարթափող թնդանոթով, 7,62 ու 12,7 մմ գնդացիրներով, ինչպես նաև Ռեֆլեքս հակատանկային կառավարվող հրթիռներով։ Տանկն արտադրվում է 2000-ից, իսկ սպառազինության մեջ կիրառվում է 2001-ից։