Նոյեմբերի 5-ին հայկական զինված ուժերի հետախուզության զորքերը նշել էին իրենց կազմավորման 21-ամյակը։ Արզնիի օդանավակայանի տարածքում անցկացված միջոցառմանը ցուցադրվել են նաև անօդաչու թռչող սարքեր։ Ռազմինֆոն մանրամասնում է՝ ինչ տիպի անօդաչու սարքեր են ցուցադրվել։
Միջոցառմանը ցուցադրվել է հայրենական արտադրության «Բազե», ինչպես նաև «ուղղաթիռային» տիպի ԱԹՍ-ներ։
Դրանցից բացի, ներկայացվել է նաև մեկ այլ ԱԹՍ, որը, դատելով թևերի ձևից ու բացվածքից, կորպուսի կառուցվածքից, պոչի դիրքից ու այլ հատկանիշներից «Պտերո» ռուսական արտադրության անօդաչու թռչող սարքն է։
Հիշեցնենք, որ դեռ 2012-ի հուլիսին «ԱՖՄ-Սերվեր»-ի գլխավոր տնօրեն Ամիր Վալիևը ռուսական «Ավիապորտ» պորտալին տված հարցազրույցում հայտնել էր, որ Հայաստանը գնել է 4-ական միավոր «Պտերո-Ե4» և «Պտերո-Ե5» անօդաչու սարքերի համալիրներ։ Ըստ Վալիևի՝ դրանք ձեռք էին բերվել այդ թվում ՀՀ ԱԻՆ-ի համար։
Սկզբունքորեն բացառված չէ նաև, որ ցուցադրվել է ռուսական ԱԹՍ-ի տեղական կրկնօրինակը, սակայն կարծում ենք, որ դրա հավանականությունը փոքր է։
«Պտերո» ընտանիքի անօդաչու սարքերն իրենց համալիրներով արտադրվում են 2001-ին հիմնված Սմոլենսկի «ԱՖՄ-Սերվերս» ՓԲԸ-ի կողմից 2004-ից ի վեր։ 2007-ին փորձարկումների ընթացքում առաջին անգամ ստացվեցին այս տիպի ԱԹՍ-ներից արված լուսանկարները: «Պտերո» ընտանիքի անօդաչու համալիրներից հայտնի են «Պտերո-Ե4» և «Պտերո-Գ0» մոդիֆիկացիաները։
Հայաստանի կողմից ձեռք բերված «Պտերո-Ե5»-ի, ինչպես և «Պտերո-Ե4»-ի վրա տեղադրված է էլեկտրական շարժիչ, սակայն Ե5-ում պոչի ձևավորումը փոփոխված է։
Հարկ է նշել, որ հայկական կողմը պաշտոնապես չի արձագանքել ԱԹՍ-ների համալիրների ստացման տեղեկությանը։
Պտերո”Ե4/Ե5 մարտավարատեխնիկական տվյալները
- Զանգվածը՝ 20 կգ
- Էլեկտրական շարժիչի հզորությունը՝ 3.5 կՎտ
- Կրեյսերային արագությունը՝ 85 կմ/ժ-115 կմ/ժ
- Թռիչքի մեկնարկի առավելագույն բարձրությունը՝ ծովի մակերևույթից 2000 մ
- Սահմանված երթուղիով՝ լիովին ավտոմատացված թռիչքի հեռավորությունը՝ 80 կմ
- Արձակման տեսակը՝ կատապուլտով
- Վայրէջքը՝ պարաշյուտով
Մեկ համալիրի կազմում են «Պտերո» անօդաչու սարքը, աերոնկարահանման սարքավորումը, վերգետնյա արձակման կայանը, թռիչքի կառավարման ծրագրային համակարգը, ստացված տվյալների մշակման ու վերլուծության համար ծրագրային ապահովումը։
«Պտերո»-ն նախատեսված է քարտեզագրական աերոնկարչության, գիտական-հետազոտական տեսանկարահանում ու լուսանկարահանում կատարելու, նաև ռազմական ոլորտում կիրառելու համար։