ԱՄՆ զինված ուժերի գեներալ-մայոր Մայքլ Քերին, ում հրամանատարության ներքո է միջմայրցամաքային բալիստիկ հրթիռների երեք ռազմաբազա, ազատվել է զբաղեցրած պաշտոնից՝ «վստահության կորստի» պատճառով։ Այս մասին հայտնում է«Ռոյթերս» գործակալությունը՝ հղում անելով Պենտագոնի ներկայացուցչին։
ԱՄՆ ռազմաօդային ուժերի գեներալ-մայոր Մայքլ Քերի
Ազատման ճշգրիտ պատճառը դեռևս չի նշվում, բայց հայտնի է, որ աշխատանքից ազատումը Քերիի նկատմամբ ներքին հետաքննության արդյունք է։ Ինչպես գրում է The Wall Street Journal-ը, ԱՄՆ ռազմաօդային ուժերը հրաժարվել են մանրամասներ ներկայացնել, բայց նշել են, որ միջուկային զենքի ոլորտում զինծառայողների պահվածքը խիստ կարևոր է։ Մեկ այլ աղբյուր, որն իբր թե մոտ է ռազմական շրջանակին, նշել է, որ Քերիի ազատման պատճառը կապված է ալկոհոլ օգտագործելու հետ։
Պենտագոնի ներկայացուցչի հավաստմամբ՝ գեներալ-մայորի ազատման որոշումն ընդունել է ԱՄՆ ՌՕՈւ Գլոբալ հարվածային հրամանատարության ղեկավար գեներալ-լեյտենանտ Ջեյմս Կովալսկին։
Տեղեկացնենք, որ սա վերջին օրերի ընթացքում բարձրաստիճան զինծառայողների ազատման երկրորդ դեպքն է։ Հոկտեմբերի 9-ին հայտնի է դարձել, որ աշխատանքից ազատվել է ԱՄՆ Ռազմավարական հրամանատարության ղեկավարի տեղակալ Թիմ Ջիարդինան, ով պատասխանատու է եղել միջուկային ուժերի համար։ Նրան մեղադրում են խաղատան համար կեղծ խաղանիշներ օգտագործելու համար։