Սեպտեմբերի 25-ի առավոտյան ՊՆ վարչական համալիրում կայացել է Հունաստանի Ազգային պաշտպանության գլխավոր շտաբի պետ, գեներալ Միխաիլ Կոստարակոսի գլխավորած պատվիրակության դիմավորման հանդիսավոր արարողությունը, որին հետևել է երկկողմ բանակցություններն ու ռազմական համաձայնագրի կնքումը։
Արարողության ավարտին հետևել է ՀՀ ԶՈւ ԳՇ պետ, գեներալ-գնդապետ Յուրի Խաչատուրովի առանձնազրույցը գեներալ Միխաիլ Կոստարակոսի հետ, և այնուհետև` հանդիպում ընդլայնված կազմով ՀՀ ԶՈՒ ԳՇ և ՀԱՊԳՇ բարձրաստիճան պաշտոնյաների մասնակցությամբ:
Հայկական և հունական պատվիրակությունների բանակցությունների ավարտին ստորագրվեց ռազմական ոլորտում հայ-հունական համագործակցության 2014 թվականի ծրագիրը, ապա կողմերը հանդես են եկել համատեղ հայտարարությամբ:
ՀՀ ԶՈւ ԳՇՊ-ն հանդիպումից հետո նշեց, որ երկկողմ ռազմական համաձայնագրով նախատեսվում է 10-ից ավել միջոցառում իրականացնել։
Խաչատուրովը նաև շնորհակալություն հայտնեց հույն գործընկերոջից, որ Հունաստանի համար նման բարդ տնտեսական ժամանակաշրջանում շարունակում է Հայաստանի հետ համագործակցություն ուսումնավարժական ծրագրերով։
Միխաիլ Կոստարակոսն իր հերթին նշեց, որ մեծ պատիվ է, որ իրեն ընդունել է ՀՀ նախագահը և հավելեց, որ հայ-հունական հարաբերությունների ներկա մակարդակն ու նման համաձայնագրերի կնքումն ապացուցում են, որ երկու երկրների միջև համագործակցությունը խորը պատմական արմատներ ունի։
Նա նաև նշեց, որ Հայաստանի և Հունաստանի զինված ուժերը չեն սահմանափակվում միայն իրենց պետությունների անվտանգությունն ապահովելու խնդրով, այլ իրականացնում են նաև միջազգային առաքելություններ, համատեղ ծառայում թեժ կետերում։
Հունաստանի պատվիրակությունն այցելելու է նաև Հայոց ցեղասպանության հուշահամալիր և ծաղկեպսակ դնելու անմեղ զոհերի հիշատակին։