Թուրքիան ստորջրյա պաշտպանության զորավարժություն է անցկացնում այսպես կոչված «Հյուսիսային Կիպրոսի թուրքական հանրապետությունում» տեղակայված զորքերի մասնակցությամբ։
Ստամբուլի «Անադոլու քավաղը» նավահանգստում ընթացող վարժանքները մեկնարկել են սեպտեմբերի 16-ին և տևելու են 9 օր։
Զորավարժությանը մասնակցում են Թուրքիայի ռազմածովային ուժերի ստորջրյա պաշտպանության ստորաբաժանումներն ու այսպես կոչված «Հյուսիսային Կիպրոսի թուրքական հանրապետության» հատուկ նշանակության ջոկատները։
Հիշեցնենք, որ 1974 թվականին Թուրքիայի զինված ուժերը ներխուժեցին Կիպրոս («Աթիլլա» գործողություն) և բռնազավթեցին նրա հյուսիսային շրջանը (կղզու 37 տոկոսը)։
Թուրքիան իր ներխուժումը պատճառաբանեց այն բանով, թե իբր «պաշտպանում է կղզում բնակվող թուրքերին այդ ժամանակ Հունաստանում իշխանության գլուխ եկած «սև գեներալներից»։
Օկուպացված շրջաններում ստեղծվեց «Հյուսիսային Կիպրոսի թուրքական հանրապետությունը», որը պաշտոնապես ճանաչված չէ աշխարհում (բացի Թուրքիայից):
Մինչ այժմ Կիպրոսի հյուսիսը շարունակում է գտնվել թուրքական բանակի վերահսկողության ներքո։