Airbus ընկերության՝ իսպանական Սևիլիա քաղաքում գտնվող գործարաններից մեկում արդեն սկսել են Թուրքիայի համար նախատեսված A400M բեռնատար ինքնաթիռը ներկել այդ երկրի ռազմաօդային ուժերի համար սահմանված գույներով։
Թուրքիային պատկանող ինքնաթիռի վրա հայտնվել է թուրքական դրոշն ու Կեսարիայի Էրքիլեթ շրջանում գտնվող 221-րդ ռազմակայանի տարբերանշանը՝ թռչող արագիլը։ Այս ամենից կարելի է ենթադրել, որ թուրքական օդուժի առաջին A400M-ը տեղակայվելու է Կեսարիայում։
A400M. Թուրքիայի ՌՕՈւ
Թուրքիայում ինքնաթիռին արդեն նաև անուն են տվել։ Այն ստացել է հայտնի թուրք ըմբիշ Քոջա Յուսուֆի անունը։
Սպասվում է, որ ինքնաթիռը Թուրքիային կհանձնվի սեպտեմբերի վերջին։
Հիշեցնենք, որ Թուրքիայի համար նախատեսված ինքնաթիռն առաջին թռիչքը կատարել էր օգոստոսի 9-ին։ Թուրքիան ընդհանուր առմամբ պետք է ստանա 10 միավոր A400M:
Ինքնաթիռի ստեղծման աշխատանքներին և ֆինանսավորմանը մասնակցել են Ֆրանսիան, Գերմանիան, Մեծ Բրիտանիան, Իսպանիան, Լյուքսեմբուրգը, Բելգիան, Մալայզիան, ինչպես նաև Թուրքիան, որոնք էլ նախատեսում են ստանալ ընդհանուր 174 միավոր A400M:
Առաջին ինքնաթիռն այս ամսվա սկզբին ստացել է Ֆրանսիան։
Defense News-ի տեղեկություններով՝ սպասվում է, որ Մեծ Բրիտանիան առաջինA400M-ը կստանա 2014 թվականին, իսկ Գերմանիան՝ 2015 թվականին։
Airbus ընկերության արտադրած A400M Atlas ուղևորատար-բեռնատար ինքնաթիռն ունակ է տեղափոխել մինչև 37 տոննա բեռ կամ 116 մարդ, ինչպես նաև կարող է օդում լիցքավորել կործանիչներ և այլ ինքնաթիռներ։
A400M ինքնաթիռների ստեղծման գործընթացը սկսվել է 2000-ականների սկզբին: Առաջին թռիչքը կատարել է 2009 թվականին։ Մեկ միավոր ինքնաթիռի մոտավոր արժեքն է 136 մլն եվրո։
Այն կարող է զարգացնել մինչև 790 կմ/ժ արագություն, թռիչքներ կատարել 9,3 հազար կմ հեռավորության վրա։