Մամուլն այսօր անդրադարձել էր բանակում գրանցված երկու միջադեպերի հետևանքների ընթացքին՝ ծեծի արդյունքում հոգեխանգարման հասած զինվորին ազատել են բանակից, երևանցի Աղասի Աբրահամյանի մահվան գործով նոր բացահայտումներ չկան:
- Զորամասում ծեծի հետևանքով հոգեխանգարման հասած Ժորա Մկրտչյանին ազատել են զինծառայությունից, իսկ հայրը՝ հետ է վերցրել մեղադրանքը: Նա նշել է, որ իրեք միջոցներ չունեն որդուն բուժելու նպատակով, իսկ բողոքը հետ է վերցրել, քանի որ որդին է այդպես խնդրել ու չի ցանկանում, որ իրեն այդ վիճակին հասցրած ծառայակիցները հեռու լինեն իրենց ծնողներից:
- Բանակում ոչ մարտական պայմաններում մահացած երևանցի Աղասի Աբրահամյանի մահվան գործով նոր բացահայտումներ չկան, իսկ նրա ծառայակից ընկեր Գրիշա Եգորյանը պահվում է ՌՈ-ում, չնայած, ըստ հրապարակման, գործով վկա չէ: Հրապարակումների համաձայն, Աղասի Աբրահամյանը մահացել էր ծառայակիցների ծեծի հետևանքով:
- Ռազմական փորձագետ Արծրուն Հովհաննիսյանը համոզված է, որ ԱՄՆ–ն այլևս չի կարողանում սպառազինության ոլորտում նախկինի նման նյութական մեծ ծախսեր անել, բայց անգամ կրճատված բյուջեն հսկայական է և կազմում է մոտ մոտ 600 մլրդ դոլար:
Միջազգային լուրերը հայկական մամուլում
- Ֆրանսիան կոչ է անում Իրանի դեմ նոր, աննախադեպ դաժան պատժամիջոցներ կիրառել, իսկ միջազգային մամուլը վկայում է, որ մինչ Ֆրանսիան կոչ է անում՝ Թուրքիան հրաժարվում է Իրանի դեմ պատժամիջոցներ կիրառել:
- Եվրոպայի և Եվրասիայի հարցերով ԱՄՆ փոխպետքարտուղար Ֆիլիպ Գորդոնը հայտարարել է, որ ԱՄՆ նոր պաշտպանական ռազմավարության մեջ Թուրքիան շարունակում է մնալ որպես չափազանց կարևոր դաշնակից:
- Թուրքիայի վարչապետ Ռեջեփ Թայիփ Էրդողանը հայտարարել է, որ Իրաքից ամերիկյան զորքերի դուրսբերումը վաղաժամ արված քայլ է եղել:
- Որոշ աղբյուրների համաձայն՝ Իսրայել է ժամանել 9 հազար ամերիկացի զինվորական, որտեղ ամերիկյան զորքերի հրամանատարական կետ է ստեղծվելու: Վերլուծաբանները զորքի տեղափոխությունը համարում են նախապատրաստություն հավանական պատերազմին:
- Մյուս կողմից՝ Իսրայելը ռազմական նոր դաշնակիցներ է գտել՝ Կիպրոսն ու Հունաստանը: Իսրայելի և Կիպրոսի պաշտպանության նախարարները երկու համաձայնագիր են ստորագրել, որոնք ուղղված են այդ երկրների միջև պաշտպանության ոլորտում համագործակցության զարգացմանը:
- Իրանի հետ սահմանը հսկող 2 թուրք զինվորականներ հերթապահության ժամանակ վիճաբանել են, որն ավարտվել է կրակահերթով: Զինվորներից մեկը տեղում մահացել է, մյուսը՝ ծանր վիրավորվել։
- Մինչ արևմուտքն անհանգստացած է Իրանի միջուկային ծրագրով՝ այդ երկրի նախագահ Մահմուդ Ահմադինեժադը Վենեսուելայում հանդիպել է նախագահ Ուգո Չավեսի հետ և նշել, որ ԱՄՆ-ի անհանգստությունը, թե Իրանը ատոմային ռումբ է ստեղծում՝ ոչ այլ ինչ է, քան Իրանի զարգացումը կանխելու նպատակ:
- Իսկ Վրացական մամուլը ենթադրում է, որ 2011թ. Վրաստանը ԽՍՀՄ արտադրության 2С1 Гвоздика ինքնագնաց հրետանային համակարգեր է գնել, որի նպատակը 2008 ռուս-վրացական պատերազմի ընթացքում ունեցած կորուստների վերականգնումն է: