Բրազիլիայի ցամաքային զորքերի հրամանատարությունը մտադիր է Պենտագոնի հետ պայմանագիր կնքել՝ 36 միավոր օգտագործված, 155 մմ տրամաչափի M109A5 հաուբիցների ձեռք բերելու վերաբերյալ։
M109A5 հաուբից
Ընդ որում, համաձայնագիրը ծրագրում են կնքել մինչև ընթացիկ տարվա օգոստոսի վերջը։ ԱՄՆ-ն պետք է իր ունեցած հաուբիցներն արդիականացնի՝ դրանք հասցնելով M109A5+ չափանիշներին, ապա փոխանցի դրանք բրազիլական զորքերին։
Համաձայն «Ջեյնս» վերլուծական պարբերականի տվյալների՝ պայմանագրի կնքումից անմիջապես հետո ամերիկյան ԶՈւ-ն համաձայնագիր կկնքի BAE Systems Land & Armament ընկերության հետ, որին էլ հանձնարարվելու է հաուբիցների արդիականացումը։ Դրանք կստանան նոր շարժիչներ, նավիգացիոն համակարգ, հրամանատարի տեղեկությունների փոխանցման նոր համակարգ, կրակի կառավարման համակարգ, բալիստիկ կայան և այլն։
Հիշեցնենք, որ 2012-ի հուլիսին Բրազիլիայի բանակն ԱՄՆ-ից գնել էր կրկին 36 միավոր հաուբից, որոնք պետք է փոխարինեն հնացած 37 միավոր M109A3 հաուբիցներին։ Դրանք Բրազիլիան ձեռք էր բերել 1999-ին։ Պայմանագրի արժեքը չի հրապարակվել։