Հայաստանը կմասնակցի օգոստոսի 1-5 ՌԴ Հարավային ռազմական օկրուգի Ալաբինո զորավարժարանում անցկացվող տանկային բիաթլոնին։ Այս մասին Ռազմինֆոյի հետ զրույցում ասաց ՊՆ մամուլի խոսնակ Արծրուն Հովհաննիսյանը։
Վերջերս ռուսական կայքերում տարածվել էր տեղեկատվություն, ըստ որի՝ առաջին անգամ Հարավային ռազմական օկրուգի 2 զորավարժարաններում կիրականացվի տանկիստների մրցություն՝ տանկային բիաթլոն։ Հայտարարության մեջ նշվում էր, որ օգոստոսի 1-5 պլանավորված զորավարժությանը կմասնակցեն Ղազախստանը, Բելառուսը, հնարավոր է նաև՝ Հայաստանը։
Հիշեցնենք, որ ռուսական բանակում հաճախ կազմակերպվող «տանկային բիաթլոն» ուսումնական վարժանքը ենթադրում է զանազան խաչընդոտների հաղթահարում և տարբեր զինամթերքներով 0,9-2,2 կմ հեռավորության վրա 3 տարբեր թիրախների խոցում։ Ամեն մի վրիպման դեպքում անձնակազմը տանկով պետք է տուգանային շրջան կատարի՝ 0,5 կմ երկարությամբ։