Մարտի 13-ին Թուրքիայում ավարտվել են մարտի 10-ին սկսված Սիրիայի հյուսիսարևմտյան Իդլիբ նահանգի շուրջ ռուս֊թուրքական բանակացությունները։ Բանակցությունների արդյունքում ստորագրվել է գործողությունների երկկողմ համաձայագիր։
Այս մասին լրագրողների հետ զրույցում հայտարարել է Թուրքիայի պաշտպանության նախարար Հուլուսի Աքարը։ Թուրք նախարարը նշել է, որ ըստ համաձայագրի՝ մարտի 15-ին կսկսվեն Սիրիայի Մ4 մայրուղու երկայնքով թուրք֊ռուսական համատեղ պարեկությունները։
Բացի այդ, աշխատանքներն իրականացնելու համար ստեղծվելու են կոորդինացման համատեղ կենտրոններ։
Հիշեցնենք, որ համատեղ պարեկության մասին համաձայնությունը ձեռք էր բերվել մարտի 5-ին, Ռուսաստանի մայրաքաղաք Մոսկվայում ԹՀ և ՌԴ նախագահներ Ռեջեփ Թայիփ Էրդողանի և Վլադիմիր Պուտինի հանդիպման ընթացքում։
Հանդիպման ավարտին երկու երկրի ղեկավարները համատեղ մամուլի ասուլիս անցկացրին ու հայտարարեցին, որ Իդլիբում իրավիճակի կարգավորման շուրջ ստորագրվել է համաձայնագիր։
Ըստ այդ համաձայնագրի՝
- Մարտի 6-ի կեսգիշերին ժամը 00։00֊ի դրությամբ Իդլիբում հաստատվում է հրադադար;
- Մ4 մայրուղուց հյուսիս և հարավ 6֊ական կմ խորությամբ հաստատվում է անվտանգության գոտի։ Անվտանգության գոտու մանրամասները 7 օրվա ընթացքում պետք է հաստատվեն ՌԴ և ԹՀ ՊՆ֊ների կողմից;
- Մարտի 15-ից Թուրքիայի և Ռուսաստանի զինված ուժերը Մ4 մայրուղու երկայնքով՝ Թրումբա բնակավայրից դեպի Այն ալ Հավր բնակավայրն իրականացնելու են համատեղ պարեկային ծառայություն։