Թուրքիան դիմել է ԱՄՆ֊ին, որ վերջինս Patriot ՀՕՊ համակարգերի երկու մարտկոց տեղակայի իր հարավային սահմանին՝ Սիրիայի բանակի ու ռուսական ուժերի ավիացիոն հարվածներից պաշտպանվելու համար։
Այս մասին գրում է ամերիկյան Bloomberg գործակալությունը հղում անելով թուրք պաշտոնյային, որի անունը չի նշվում։
[Թարմացում] Ռուսական պետական «ՌԻԱ նովոստի» գործակալությունը գրում է, որ թուրքական պաշտոնական աղբյուրը հերքել է այս տեղեկությունը։ [Թարմացում]
Ըստ աղբյուրի Թուրքիան այժմ սպասում է ԱՄՆ պատասխանին։ Դիմումն անցած շաբաթ ուղարկվել է Սիրիայի հարցով ԱՄՆ հատուկ դեսպանորդ Ջեյմս Ջոֆրիին։
«Անկարան կարող էր Իդլիբում Ասադի հավատարիմ ուժերին հարվածելու համար օգտագործել F-16 կործանիչները, եթե Patriot֊ները տեղակայված լինեին հարավային Հաթայ նահանգում»,֊ ասել է թուրք պաշտոնյան։
Հիշեցնենք, որ Թուրքիան 2019թ․ հուլիսին Ռուսաստանից ստացավ Ս-400 զենիթահրթիռային ՀՕՊ համակարգերը, որոնք նախատեսում է գործարկել այս գարնանը։ Ռուսական համակարգերի գնման համար ԱՄՆ֊ն որոշեց Թուրքիային հեռացնել F-35 կործանիչների ծրագրից։
Թուրքիան ի պատասխան նշում էր, որ ժամանակին ԱՄՆ֊ից Patriot է ուզել, սակայն իրեն ամերիկյան կողմը մերժել է։
Հավելենք, որ այժմ Թուրքիայի Ադանա նահանգի Ինջիրլիք ավիաբազայում տեղակայված են ՆԱՏՕ անդամ Իսպանիայի Patriot ՀՕՊ համակարգերը, իսկ Քահրամանմարաշում են (Մարաշ) իտալացիների SAMP/T ՀՕՊ համակարգերը։