ՀՀ ԶՈւ ԳՇ պետի պարզաբանումները բանակում կորուստների վերաբերյալ հարցերով

Վերջին շրջանում բանակում ոչ մարտական կորուստների աճով պայմանավորված, այսօր ՀՀ ԶՈւ ԳՇ պետ գեներալ-լեյտենանտ Արտակ Դավթյանը հրավիրվել էր մասնակցելու ԱԺ մարդու իրավուքների պաշտպանության և հանրային հարցերի մշտական հանձնաժողովի նիստին։

Վաղ առավոտից տեղեկություններ են շրջանառվում Պաշտպանության բանակի հրամանատարի հրաժարականի և Ռազմական ոստիկանության պետի պաշտոնից ազատման վերաբերյալ։ ՀՀ ԶՈւ ԳՇ պետը ասաց, որ կադրային փոփոխություններ լինելու են, սակայն չմանրամասնեց՝ հորդորելով սպասել պաշտոնական հրամանագրերին։

Առանձնացրել ենք նաև նրա մյուս ուշագրավ հայտարարությունները․

«2019 թվականի հունիսից բանակում կանխվել է ինքնասպանության 8 դեպք»

«Ասեմ, որ ունենք նաև սպաների կարգապահական խրախուսումներ, որոնք կանխել են ինքնասպանություններ։ Կատարած աշխատանքի արդյունքներով մենք ունենք ինքնասպանությունը չավարտած դեպքեր: Նրանց ծնողներն ու իրավապահները արդեն իրական վիճակով կարողանում են ասել, թե ինչքան է պատճառը կապված բանակի կամ այլ խնդիրների հետ։ Դրանց մի մասը նեղ անձնական բնույթի տվյալներ են, որ չէի ցանկանա հրապարակել»:

2020-ին բանակում մահվան դեպքերի պատճառները

«13 զինծառայողից 4-ի մահը կապված է եղել հիվանդության հետ, 4-ինը՝ դժբախտ պատահարի։ Մնացած ինքնասպանության հասցնելու կամ այլ պատճառներով զոհերի հետ կապված հարուցվել են քրեական գործեր, որոնց շրջանակներում էլ պատասխաններ կլինեն։ Մեր մասով, բացի մեր հայտնաբերած կոնկրետ թերությունների հետ կապված սպաներին պատժելուց, մենք շրջաբերականներով դեպքի նկարագիրը պարբերաբար՝ ոչ պակաս քան շաբաթը մեկ անգամ, ներկայացնում ենք ԶՈւ ողջ հրամանատարական կազմին, ներկայացնում ենք կատարված դեպքի նկարագիրը, ծնող պատճառները, կարգադրական կարգը կամ առաջարկները, որպեսզի դասեր քաղեն և թերությունները բացառեն»։

Կարգապահական տույժեր

«Մենք ունենք օրենք, օրենքի առջև հավասար են բոլորը, մեղավորը կորոշվի դատարանի վճռով, այնպես որ հիմա որևէ դեպքի հետ կապված պատասխանատու նշանակելը ճիշտ չեմ համարում։ Ինչ վերաբերում է կարգապահական կանոնադրություններով հասնող տույժերին, այո, բոլոր դեպքերով ծառայողական քննությունները անցկացվում են, ելնելով ծառայողական քննությունների արդյունքներից, մենք ունենք սպայական կազմի և՛ պաշտոնից հեռացումներ, և՛ զորացրումներ»։

Սպաներին չպատժելու տաբուներ չկան

«Նախկինում էլ չի եղել, հիմա էլ, եթե անգամ ցանկանանք: Եթե հանցագործություն է կատարել որևէ սպա կամ պաշտոնատար անձ, դրանք կոծկելը ձեռնտու չէ առաջին հերթին բանակին, որովհետև նույն հաջողությամբ վաղը մյուսն էլ կգործի, երկրորդն էլ, երրորդն էլ։․․․Ես քննչականի գործունեության հետ կապված չեմ կարող որևէ բան պատասխանել, ցանկացած դեպքում, եթե ինչ-որ բան անգամ ապացուցվել է, ծնողը կարող է դա էլ չընդունել, դա ես չեմ կարող մեկնաբանել: Դա քրեական գործի շրջանակներում իրականացված արդյունքներն են, մենք քրեական գործընթացներ չենք իրականացնում, աջակցում ենք, համապատասխան սպաները, պաշտոնատար անձինք ընդգրկվում են վկայի կամ այլ կարգավիճակներով, տաբուներ չկան մեզ մոտ»:

«Բանակում կան քրեական ենթամշակույթի տարրեր»

«Բանակում քրեական ենթամշակույթի էլեմենտներ, իհարկե, կան, ինչպես նաև հասարակության մեջ։ Եվ չի կարող մի բան լինել հասարակության մեջ, բանակում չլինել։ Աշխատում ենք այդ ուղղությամբ»։

«Պաշտպանության նախարարի հետ տարաձայնություններ չկան, կան աշխատանքային քննարկումներ»

«Գլխավոր շտաբի պետը ենթարկվում է պաշտպանության նախարարին և որևէ տարաձայնություն համատեղ աշխատանքում չունենք, եթե հաշվի չառնենք աշխատանքային քննարկումները, որ հաճախ ներակայցվում են որպես խիստ հակասություններ: Պետ-ենթակայի մեջ [հակասությւն ― Ռազմինֆո] չի կարող լինել, եթե սկզբունքային տեսակետեր լինեն, հրաժարական կտամ, որևէ խնդիր չեմ տեսնում»:

One response to “ՀՀ ԶՈւ ԳՇ պետի պարզաբանումները բանակում կորուստների վերաբերյալ հարցերով

  1. 1.Ռազմագիտություն առարկայի դասավանդումը պետք է խստացվի:
    .Աշակերտը ռազմական գիտելիքներին ծանոթանալու հետ մեկտեղ պետք է ստանա նաև բարոյահոգեբանական դասեր:
    .Աշակերտի մոտ բարձրացվի կամքի ուժը,կարևորվի հանդուրժողականությունը,սովորեցվի ընկերասիրություն,որից էլ ծնվում է հայրենասիրությունը:
    .Ռազմագիտություն առարկան պետք է ունենա զինվորական ծառայության <>պատկերը:
    Ծրագրի շրջանակներում աշակերտները պետք է ծանոթանան զորամաս հասկացությանը,շոշափելի տեսնեն զինվորի մահճակալը,ճաշարանը:
    .Ռազմագիտություն դասավանդողը վերջում պետք է բնուրագիր տա ապագա զինակոչիկի մասին,որը պիտի կցվի վերջինիս գործերի հետ և պարտադիր ուսումնասիրվի տվյալ զորամասի հրամանատարի կողմից:
    2.Զորամասերում զինվորների առօրյայի խիստ հսկողություն(նույնը դիրքերում):
    .Դասակի հրամանատարը միշտ իր դասակի հետ պետք է լինի,զինվորներին պահի իր տեսադաշտում:Նա ուշադիր պետք է լինի ամեն զինվորի առողջության,տրամադրության ու պահվածքի նկատմամբ և հաշվետու լինի մարտկոցի հրամանատարին,վերջինս ՝դիվիզիոնի հրամանատարին,վերջինս՝գնդի հրամանատարին:
    .Վերոհիշյալ անձինք բացթողումների հետևանքով դիպվածների ու դժբախտ պատահարների դեպքում պատասխանատվության ենթարկվեն օրենքի ամբողջ խստությամբ(իրենք արմատական մեղավորներն են):
    3.Մինուճար տղաների զորակոչը լինի վերապահումով.ինչպես ծնողազուրկների դեպքում:
    Մինուճար տղան՝ընտանիքի միակ լույսը առաջնագծում պիտի չլինի:Իհարկե,կասեք,որ բոլորն էլ իրենց ծնողի լույսն են:Հավատացեք,կա տարբերություն աղջիկներ ու տղաներ ունեցող ընտանիքի և միակ զավակ ունեցողի միջև:
    Կինը տասնհինգ տարի երեխա չունենալուց հետո վերջապես ունեցավ իր միակին,ուղարկեց ծառայության,ապրիլյան պատերազմը սպանեց նրա լույսն ու հույսը:
    4.Տարիքով մեծ,կրթված,կարմիր դիպլոմով տղայի ծառայությունը չպետք է հավասարվի դպրոցական նստարանից նոր պոկած անկիրթ(բառի բուն իմաստով),անլուրջ մասսայի հետ:
    Ուսումնական տեղամասում գործ չունի դեռ ոչ մի կրթություն չստացած, փողոցի <> իր հետ բանակ տարած տղան:Հավատացեք,վիրավորանք է կրթվածի նկատմամբ:Չի գնահատվում խելքն ու կարողությունը:Սա սեփական փորձից գիտեմ:
    Հ.Գ. Հայրենիքի հաջող պաշտպանությունը պայմանավորված է որակով,այլ ոչ թե քանակով:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *