Կորեայի Հանրապետությունը նոր կործանիչներ ձեռք բերելու մրցույթ է հայտարարել, փոխանցում է Defense Talk-ը։
Հարավկորեական կողմը նախատեսում է ձեռք բերել 60 ժամանակակից կործանիչներ, որոնց համար առավելագույնը տրամադրելու է 7,3 մլրդ ամերիկյան դոլար։
Երկրի խորհրդարանի որոշմամբ՝ մեկ կործանիչի համար առավելագույնը թույլատրվում է վճարել 122 մլն ամերիկյան դոլար։
Ըստ Defense Talk-ի տեղեկությունների՝ Հարավային Կորեայի պաշտպանության նախարարության հայտարարած մրցույթին մասնակցում են «Բոինգը» (Boeing), «Լոքհեդ Մարթինը» (Lockheed Martin), EADS-ը։
F-35A
«Լոքհեդ Մարթինը», որը F-35 Lightning II կործանիչի արտադրողն է, որոշել է մասնակցել մրցույթին, թեև նրա առաջարկած հինգերորդ սերնդի կործանիչի արժեքն առանց սպառազինության շուրջ 153 մլն դոլար է։ «Լոքհեդ Մարթինը» պայմանագրին կից խոստանում է աջակցել Կորեային ռազմական նշանակության արբանյակներ ստեղծելու հարցում։
F-15-Silent Eagle
«Բոինգն» առաջարկում է F-15 Silent Eagle կործանիչը, որը 70-ականներին ստեղծված F-15-ի խորապես կատարելագործված տարբերակն է։ F-15 Silent Eagle-ը 4++ սերնդի կործանիչ է, իսկ նրա մոտավոր արժեքը 100 մլն ամերիկյան դոլար է։ «Բոինգը» հարավկորեական կողմին խոստանում է պայմանագիր կնքելու դեպքում համագործակցել նաև տեղի պահեստամասեր արտադրող ընկերությունների հետ։
Eurofighter Typhoon
Եվրոպական EADS կոնցերն առաջարկում է Eurofighter Typhoon կործանիչը, որը նույնպես 4++ սերնդի է։ Այս կործանիչի արժեքը կազմում է 123 մլն ամերիկյան դոլար։ EADS-ը նաև առաջարկում է Կորեայի հետ միասին զբաղվել հինգերորդ սերնդի կործանիչների ստեղծմամբ։ Եվրոպական կոնցերնը պատրաստ է 2 մլրդ դոլար ներդրում կատարել այդ նախագծում։
Ըստ աղբյուրի՝ հարավկորեացիներն առաջիկա երկու շաբաթվա ընթացքում կշարունակեն հայտեր ընդունել։