Փարիզում ռուսական «Ռոսօբորոնէքսպորտի» և ԱՄՆ-ի ցամաքային զորքերի միջև պայմանագիր է կնքվել, որով նախատեսվում է «Մի» ուղղաթիռներ մատակարարել Աֆղանստանի զինված ուժերի համար։
Պայմանագիրը կնքվել է հունիսի 16-ին, փոխանցում է «Ռիա Նովոստին»՝ հղում կատարելով ՌԴ ռազմատեխնիկական համագործակցության դաշնային ծառայությանը։
Մի-17Բ5
Պայմանագրի մանրամասների վերաբերյալ տեղեկություններ չեն հաղորդվում։ Միայն հայտնի է, որ ռուսական «Մի» ուղղաթիռները մատակարարվելու են աֆղանական բանակին։ Չի մանրամասնվում նաև, թե «Մի» ուղղաթիռների կոնկրետ որ տեսակի մասին է խոսքը։
Նշենք, որ 2011 թվականի մայիսին «Ռոսօբորոնէքսպորտն» ու ԱՄՆ պաշտպանության նախարարությունը 367,5 մլն դոլար արժողությամբ պայմանագիր էին կնքել, որով ռուսական կողմը 21 միավոր Մի-17Բ5 տեսակի մարտական-ուղևորափոխադրող ուղղաթիռներ էր տրամադրել Աֆղանստանին։ Պայմանագրի ընդհանուր արժեքը կազմել էր 900 մլն դոլար, որի մեջ ներառված էր նաև ուղղաթիռների տեխնիկական սպասարակումն ու պահեստամասերի տրամադրումը։