Մայիսի 11-ին Թուրքիայի հարավարևելյան Շրնաք նահանգում «Քրդստանի աշխատավորական կուսակցության» (PKK) դեմ գործողությունների ընթացքում սպանվել է 1 թուրք զինծառայող, վիրավորվել ևս 1-ը: Այս մասին հայտնում է թուրքական պետական «Անադոլու» գործակալությունը:
Գործողությունների ժամանակ քուրդ զինյալների տեղադրած ինքնաշեն պայթուցիկ սարքը պայթել է, ինչի հետևանքով էլ զինծառայողը մահացել է: Թուրք ուժայինները շարունակում են PKK-ի դեմ գործողությունները Շրնաք նահանգում:
Թուրք-քրդական բախումները Թուրքիայի արևելքում և հարավ-արևելքում վերսկսել են դեռևս 2015-ի ամռանից: Քրդերի դեմ գործողություններում ներգրավված են թուրքական բանակը, ժանդարմերիան, ոստիկանությունը:
Բացի Թուրքիայի տարածքից, Թուրքիայի օդուժը նաև պարբերաբար հարվածում է PKK-ի դիրքերին Իրաքի հյուսիսում: Թուրքական բանակը երբեմն Իրաքի հյուսիսում՝ անմիջապես Թուրքիային սահմանակից լեռնային հատվածներում, իրականացնում է նաև փոքրամասշտաբ ցամաքային գործողություններ:
2018-ի հունվարից Թուրքիան քրդական ուժերի դեմ գործողություններ սկսեց նաև Սիրիայի Աֆրին շրջանում: Թուրքիան Սիրիայի քրդական «Ժողովրդական ինքնապաշտպանության ջոկատների»՝ YPG-ին համարում է PKK-ի «սիրիական թև և նույնպես ահաբեկչական կառույց»: