Մայիսի 10-ին Գոլանի բարձունքները, որոնք գրավված են իսրայելական զինուժի կողմից, հրթիռակոծման են ենթարկվել: Իսրայելի պաշտպանության բանակի մամուլի ծառայությունը հայտնել է, որ շուրջ 20 հրթիռ է արձակվել Սիրիայում տեղակայված իրանական ուժերի կողմից: Իսրայելը պատասխան հարվածել է իրանցիների կրակային դիրքերին և այլ թիրախների:
Իսրայելական կողմի պնդմամբ՝ Գոլանի բարձունքների հրթիռակոծման ժամանակ ոչ ոք չի տուժել: Պատասխան հարվածը հասցվել է «Ուրագան» համազարկային կրակի ռեակտիվ համակարգերի դիրքերի ուղղությամբ: Նշենք, որ Իսրայելի պաշտպանության բանակի մամուլի ծառայության հրապարակած տեսագրությունում ներկայացված է «Սմերչ» ՀԿՌՀ: Իսրայելի ՊԲ մամուլի քարտուղար Ջոնաթան Կոնրիկսը Twitter-ի իր էջում քարտեզ է հրապարակել, որտեղ ներկայացված են Սիրիայում իրանական թիրախներին հասցված հարվածները:
The IDF has struck dozens of Iranian military targets in Syria in response to the Iranian rocket attack against Israel. Quds force is behind attack and has played the initial price. IDF remains ready for various scenarios but does not seek to escalate the situation. pic.twitter.com/4rC8gHK2LG
— Jonathan Conricus (@LTCJonathan) May 10, 2018
Սիրիական պետական «ՍԱՆԱ» գործակալությունը նույն օրը հայտնել է, որ Սիրիայի ՀՕՊ միջոցներով տասնյակ իսրայելական հրթիռներ են խոցվել, սակայն դրանցից որոշները ընկել են ՀՕՊ միջոցների վրա, ռադարի վրա և զենք ու զինամթերքի պահեստի վրա: Զոհվածներ և տուժածներ չկան:
Նշենք, որ իրանա-իսրայելական հարաբերությունները կտրուկ լարվել են Իսրայելի վարչապետ Բենյամին Նեթանյահուի հայտարարությունից հետ: Ըստ նրա՝ իսրայելական հետախուզությանը հաջողվել է միջուկային արխիվի փաստաթղթեր դուրս բերել Իրանից: Փաստաթղթերը իբրև թե ապացուցում են, որ Իրանը շարունակում է գաղտնի միջուկային ծրագիրը: Դրանից հետո, մայիսի 8-ին ԱՄՆ նախագահ Դոնալդ Թրամպը հայտարարեց, որ ԱՄՆ դուրս է գալիս Իրանի հետ միջուկային համաձայնագրից և տնտեսական նոր պատժամիջոցներ է հայտարարելու Իրանին: