«Ռուսաստանի ուղղաթիռներ» հոլդինգի գլխավոր տնօրեն Անդրեյ Բոգինսկին Թուրքիայում անցկացվող Eurasia-2018 ավիացուցահանդեսի ժամանակ հայտարարել է, որ Իրանից արդեն 2 միավոր Կա-226Տ բազմանպատակային ուղղաթիռներ մատակարարելու հայտ են ստացել։ Այս մասին տեղեկացնում է ռուսաստանյան «ՌԻԱ նովոստի» լրատվական գործակալությունը։
Բոգինսկին հայտարարել է, որ ներկայում բանակցություններ են ընթանում, սակայն չի նշել, թե իրանական որ ընկերությունն է պատվիրատուն։
«Այժմ ընթանում են նախապայմանագրային աշխատանքներ»,-ասել է Բոգինսկին։
Կա-226Տ ուղղաթիռ
Նշենք, որ օգոստոսի սկզբից Իրանում փորձարկվում էր Կա-226Տ բազմանպատակային ուղղաթիռ։ Փորձարկումների արդյունքում հաստատվել էր բարձր ջերմային պայմաններում ուղղաթիռները շահագործելու հնարավորությունը։
Ուղղաթիռի փորձարկումները անցկացվում էին Իրանի ուղղաթիռաշինական ընկերության (Iran Helicopter Support & Renewal Company (IHSRC)) աջակցությամբ՝ համաձայն 2017 թ. մայիսին կնքված փոխըմբռնման հուշագրի դրույթների։
Փորձարկումների ավարտից հետո «Ռուսաստանի ուղղաթիռներ» հոլդինգը Կա-226Տ բազմանպատակային ուղղաթիռներով հետաքրքրված Իրանի նախարարությունների և գերատեսչությունների համար Իրանում կոնֆերանս էր կազմակերպել և ներկայացրել ուղղաթիռները։
Կոնֆերանսի ընթացքում հնարավոր պատվիրատուներին ներկայացվել էին ուղղաթիռների տեխնիկակական բնութագրերը, շահագործման առանձնահատկությունները։