Telegram սոցիալական ցանցում Սիրիայի հակամարտությունը լուսաբանող Directorate4 ալիքը հրապարակել է «Իսլամական պետություն» ահաբեկչական խմբավորման դիպուկահարների մարզումներից լուսանկարներ: Կառույցը դեռևս շարունակում է զինյալների պատրաստել Եփրատի հովտում՝ Սիրիա-Իրաք սահմանին տեղակայված շրջանում:
«Իսլամական պետությունը» դիպուկահարներ է պատրաստում. 10.04.2018
Ըստ նշված ալիքի տեղեկության՝ լուսանկարները հրապարակել է հենց ԻՊ-ն: Լուսանկարներում պատկերված են դիպուկահարների պատրաստման ընթացքը, զենքի մասերի ուսւոմնասիրության դասընթացից հատված, կրակային վարժանքները և զինյալների «ավարտական քննությունից» կադր:
ԻՊ զինյալներն իբրև «ավարտական քննություն» կրակել են մոտակայքում տեղակայված Սիրիայի բանակի զինծառայողների վրա: Հետևանքների մասին տեղեկություն չկա:
Դիպուկահար հրացանն ինքնաշեն է՝ համալրված Մոսինի հրացանի նշանոցային համակարգով: Ամենայն հավանականությամբ, ըստ նույն աղբյուրի, փողի տրամաչափը 12,7 մմ է:
ԻՊ-ն առայժմ վերահսկում է Դեր Զորի հարավում գտնվող Աբու Քանալ քաղաքի շրջակա հատվածները, որոնք սահմանակցում են Իրաքին: Ավելի վաղ տեղեկություններ էին տարածվել, որ Իրաքը և Սիրիան պատրաստվում են համատեղ ուժերով մաքրել այդ հատվածն ԻՊ զինյալներից: