Քիչ առաջ Թբիլիսիում ավարտվեց գիշերվանից մեկնարկած հակաահաբեկչական գործողությունը: Բնակարանը զբաղեցրած ահաբեկիչները «չեզոքացվել են»: Մարտական գործողություններում զոհվել է Վրաստանի ԶՈւ 1 հատուկջոկատային:
Հատուկջոկատայինները և ռազմական տեխնիկան արդեն հեռացվում են դեպքի վայրից: Ըստ Վրաստանի ՊԱԾ-ի՝ ահաբեկիչներից մեկը ձերբակալվել է: Ըստ վրացական «Իմեդի» հեռուստաընկերության՝ ահաբեկիչներից մեկն էլ սպանվել է: Դեռևս հայտնի չէ ենթադրյալ ևս մեկ ահաբեկչի ճակատագիրը:
Ռազմական գործողությունները տևեցին շուրջ 12 ժամ: Այդ ընթացքում փոխադարձ հրաձգություն և նռնականետություն էր ընթանում ուժայինների և ահաբեկիչների միջև:
Գործողություններին ներգրավվել էին Վրաստանի պետանվտանգության ծառայության և ՆԳՆ հատուկ նշանակության ստորաբաժանումները: Դեպքի վայր էին բերվել նաև «Կոբրա» զրահապատ մեքենաներ:
Դեռևս ոչ լիարժեք տեղեկությունների համաձայն՝ ահաբեկիչները ազգությամբ չեչեններ էին:
Հիշեցնենք, որ նոյեմբերի 22-ի լույս գիշերը Թբիլիսիի փողոցներից մեկում ահաբեկիչների ձերբակալման հատուկ գործողություն էր սկսվել, տարհանվել էին մոտակա շենքերի բնակիչները: Իրադարձությունները ընթացքին կարող եք հետևել այստեղ: