Հայաստանի ռազմարդյունաբերական պետական կոմիտեի կողմից մշակվում է ռազմարդյունաբերական զարգացման ծրագիր, որը պարունակում է կոնկրետ ֆինանսական, տնտեսական և կրթական ծրագրեր: Այս մասին Ռազմինֆոյին հայտնել է ՌԱՊԿ նախագահի օգնական Ավետիք Քերոբյանը:
Ավետիք Քերոբյանը «Դիջիտեկ» ֆորումի ընթացքում պատասխանում է ընկերությունների ներկայացուցիչների հարցերին
Պաշտոնյայի խոսքով՝ ծրագրի մշակումը բխում է ՀՀ նախագահի կողմից հաստատված ռազմարդյունաբերության և ռազմատեխնիկական քաղաքականության ռազմավարությունից: Այս ռազմավարությունը նախագահը ստորագրել է 2017 թ. հունվարին:
«Դա իր մեջ ունի կոնկրետ ծրագրեր: Այդ ռազմավարությունն իր մեջ ներառում է և՛ ռազմատեխնիկական ուղղությունները, որոնք պետք է զարգացվեն, և՛ ռազմակրթական ուղղությունները, և՛ ռազմական գիտության զարգացման ուղղությունները», — նշել է Քերոբյանը:
Պաշտոնյան նշում է, որ ծրագրին մասնակցում են ոչ միայն պետական կառույցները, այլև ներառվում են բազմապիսի միջոցներ՝ և՛ պետական, և՛ մասնավոր ընկերությունների ներգրավման ու զարգացման, և՛ ֆինանսավորման ու ֆինանսավորման աղբյուրների զարգացման համար:
Քերոբյանը նաև նշեց, որ ռազմարդյունաբերական պետական կոմիտեի կազմում գործում է նաև Ռազմարդյունաբերության ընկերությունների աջակցման կենտրոն, որը զբաղվում է ռազմարդյունաբերական արտադրանքի՝ արտաքին շուկաներ ներկայացնելու գործով:
ArmHiTec-2016 ցուցահանդեսին հայկական ընկերությունների ներկայացրած արտադրանքը (արխիվ)
Նշենք, որ հունիսի 15-ին ՀՀ կառավարության նիստի ընթացքում նախատեսվում է հաստատել Ռազմարդյունաբերական և ռազմատեխնիկական քաղաքականության ռազմավարությունից բխող միջոցառումների ծրագիրը: Նախագծի հիմնավորման մեջ նշվում է.
«Որոշման նախագծի ընդունումը կնպաստի ՀՀ ռազմական արդյունաբերության համակարգային բարեփոխումների իրականացմանը, և կկարգավորվեն իրավաբանական անձանց, անհատ ձեռնարկատերերի, ՀՀ գործադիր մարմինների միջև հարաբերությունները ռազմարյունաբերական համալիրում պետական ռազմարդյունաբերական քաղաքականության ձևավորման, իրականացման հարցերում, ինչպես նաև պետության տնտեսական ու ֆինանսական հնարավորությունների շրջանակներում կընդլայնվեն ներհանրապետական արտադրության տեսականին և ՀՀ զինված ուժերը և այլ զորքերը կապահովվեն ժամանակակից սպառազինությամբ և ռազմական տեխնիկայով»: