Այսօր՝ մարտի 17-ին, Ադրբեջանի ԶՈւ ռազմածովային ուժերի նախկին հրամանատար, փոխադմիրալ Շահին Սուլթանովը դատապարտվել է պայմանական 8 տարի 6 ամսվա ազատազրկման՝ փորձնական շրջանի 3 տարի ժամկետով: Այս մասին հայտնում է ադրբեջանական «ԱՊԱ» գործակալությունը:
Զինվորականը պաշտոնից ազատվել էր նոր նախարարի նշանակումից հետո սկսված իշխանության և ազդեցության գոտիների վերաբաշխման հետևանքով: 2013 թվականի հոկտեմբերին Ադրբեջանի պաշտպանության նախկին նախարար Սաֆար Աբիևը հեռացվեց պաշտոնից և նոր նախարար նշանակվեց Զաքիր Հասանովը:
Նշանակումից հետո Հասանովը սկսեց ԶՈւ-ից ազատվել Սաֆար Աբիևին մտերիմ զինվորականներից (այդ թվում նաև Շահին Սուլթանովից) և հնարավորինս տարածել ու ամրապնդել սեփական ազդեցությունը ռազմականացված կառույցներում։
Ադրբեջանի ՌԾՈւ նախկին հրամանատար Շահին Սուլթանով
2014-ի հունվարի սկզբից Ադրբեջանի ՌԾՈւ համակարգում մեկնարկեցին ռազմական դատախազության և ֆինանսների նախարարության համատեղ տեսչական ստուգումներ, որոնց արդյունքում ձերբակալվեցին առնվազն 6 բարձրաստիճան սպաներ։ Բացի այդ, ՌԾՈւ հրամանատարի պաշտոնից հեռացվեց փոխծովակալ Շահին Սուլթանովը, ով նաև 3 ամսով ազատազրկվեց՝ կաշառակերության և պետական փաստաղթերի կեղծման մեղադրանքով։
Սուլթանովին մեղադրանքներ էին առաջադրվել քրեական օրենսգրքի 313 (ծառայողական փաստաթղթերի կեղծում) և 179.3.2 (խոշոր չափի գումարների յուրացում) հոդվածներով, սակայն նա հրաժարվում էր իրեն մեղավոր ճանաչել:
Շահին Սուլթանովի պաշտոնանկությունից հետո նրա պարտականությունները սկսեց կատարել երկրորդ դասի կապիտան (փոխգնդապետ) Շահին Մեմմեդովը:
ՌԾՈւ հրամանատարի պաշտոնի համար սկսեցին պայքարել գնդապետ Հիջրան Ռուսթամզադեն, ով լավ հարաբերություններ ուներ գլխավոր շտաբի պետ Նեջմեդդին Սադիգովի հետ, և Բաքվի Ջամշիդ Նախիջևանսկու անվան ռազմական ուսումնարանի տնօրեն, մայոր Միրզա Ալմասովը: Պայքարի արդյունքում Հիջրան Ռուսթամզադեն նշանակվեց ՌԾՈւ հրամանատարի պաշտոնակատար:
Ադրբեջանի ՌԾՈւ հրամանատարի նորանշանակ պաշտոնակատար, I կարգի կապիտան Զաուր Հյումբեթովը
2017 թվականի հունվարի 25-ին, սակայն, Ադրբեջանի պաշտպանության նախարարի հրամանով Հիջրան Ռուսթամզադեն աշխատանքից ազատվեց և թոշակի ուղարկվեց, իսկ ՌԾՈւ հրամանատարի նար պաշտոնակատար նշանակվեց առաջին կարգի կապիտան (գնդապետ) Հյումբեթով Զաուր Ջելալ օղլուն: