Հունիսի 15-ին Բրյուսելում կայացել է Ուկրաինա-ՆԱՏՕ հանձնաժողովի նիստ, որին մասնակցել են Դաշինքի անդամ պետությունների պաշտպանության նախարարները: Նիստի ժամանակ մասնակիցները որոշել են Ուկրաինային տրամադրել Աջակցության համապարփակ փաթեթ (Comprehensive Package of Assistance): Այս մասին տեղեկացնում է Դաշինքի պաշտոնական կայքը:
Ուկրաինա-ՆԱՏՕ հանձնաժողովի նիստ
Ըստ հաղորդագրության՝ փաթեթի նպատակն է աջակցել Ուկրաինային հզորացնել իր պաշտպանությունն ուժեղ անվտանգային կառույցների ստեղծմամբ:
Ուկրաինա-ՆԱՏՕ հանձնաժողովի նիստի ժամանակ Դաշինքի անդամ պետությունների պաշտպանության նախարարներն Ուկրաինայի իրենց կոլեգայի՝ Ստեփան Պոլտորակի հետ քննարկել են այդ երկրի արևելյան հատվածում անվտանգային դրությունը, ինչպես նաև կառավարության բարեփոխումների զարգացումը: Ստոլտենբերգը հայտարարել է, որ «Ուկրաինայի արևելյան հատվածում իրավիճակը ռուսասանյան գործողությունների պատճառով շարունակում է մտահոգիչ մնալ»:
Ուկրաինայի պաշտպանության նախարարը և ՆԱՏՕ-ի գլխավոր քարտուղարը
Ուկրաինական « Ունիան » լրատվական գործակալությունն իր հերթին, հղում անելով իր թղթակցին Բրյուսելում, հայտնում է, որ Պոլտորակը մամուլի ասուլիսի ժամանակ հայտարարել է, թե փաթեթը ներառում է պաշտպանունակության, կապի, լոգիստիկայի, ստանդարտացման, կիբերանվտանգության, բժշկական վերականգնողական, ռազմավարական կապի, հիբրիդային պատերազմներին դիմակայելու ոլորտներում համագործակցություն:
Ստոլտենբերգը հայտարարել է նաև, որ «Ուկրաինայի զինված ուժերի արդիականացումն այն ժամանակ, երբ այն ներգրավված է հակամարտության, այդքան էլ հեշտ չէ: Բայց կառավարությունը լավ առաջընթաց է գրանցում»: