ԱՄՆ բանակի ռազմական տեխնիկան և Մեծ Բրիտանիայի ԶՈւ զինծառայողները մասնակցել են փետրվարի 24-ին Ռուսաստանին սահմանակից էստոնական Նարվա քաղաքում անցկացված ռազմական շքերթին, որը կազմակերպվել էր Էստոնիայի անկախության օրվա կապակցությամբ: Հաղորդում են ամերիկյան Washington Post և բրիտանական Telegraph պարբերականները՝ նշելով, որ այս խորհրդանշական քայլի նպատակն է ցույց տալ երկու կողմերի հարաբերությունների հնարավոր լարման հետևանքները:
Շքերթի անցկացման վայրը՝ Նարվա քաղաքը, ևս խիստ խորհրդանշական է, քանի որ այն, սահմանակից լինելով Ռուսաստանին, նաև ՆԱՏՕ-ի ու Ռուսաստանի հավանական առճակատման կիզակետերից մեկը կարող է լինել, նշում են լրատվամիջոցները։
Էստոնիայի ԶՈւ ԳՇ պետ Ռիհո Տերասը շքերթի ժամանակ հայտարարել է՝ պատմությունն իրենց սովորեցրել է, որ եթե իրենք իրենց չօգնեն, ոչ ոք չի օգնի, և հավելել, որ աշխարհը ցնցած ուկրաինաական իրադարձությունները ևս ցույց են տալիս, որ իրենք պետք է ապահովեն սեփական անվտանգությունը։
Նշենք նաև, որ անկախության տոնին նվիրված շքերթին մասնկացել են նաև մոտ 100 զինծառայող Նիդերլանդներից, Իսպանիայից, Լիտվայից ու հարևան Լատվիայից։
Հիշեցնենք նաև, որ Մերձբալթյան պետություններ Լատվիան, Լիտվան և Էստոնիան, որոնք մինչ Խորհրդային Միության փլուզումը միութենական 15 պետություններից էին, ՆԱՏՕ-ին են անդամակցել 2004-ին:
Pingback: ԱՄՆ 3000 հոգանոց զորախումբը ժամանել է Լատվիա՝ որպես հակազդեցություն ՌԴ-ին | Ռազմ.info