Թուրքիայի Ստամբուլ քաղաքում այսօր՝ 2014-ի հոկտեմբերի 20-ին, մեկնարկել է ՆԱՏՕ-ի շրջանակներում անցկացվող REGEX-14 հրամանատարական քառօրյա զորավարժությունը, որին մասնակցում են կազմակերպության գործընկեր 12 երկրների ներկայացուցիչներ։ Այս մասին հաղորդում է «Անադոլու» գործակալությունը՝ հղում անելով Թուրքիայի ԶՈւ գլխավոր շտաբի տարածած հաղորդագրությանը։
Զորավարժության հիմնական նպատակն է ամրապնդել փոխգործակցությունը մասնակից երկրների միջև և դրանց՝ տարբեր ստանդարտներ ունեցող զինված ուժերը հնարավորինս մոտեցնել ՆԱՏՕ-ի չափանիշներին։
Թուրքիայից բացի, զորավարժությանը մասնակցում են նաև Ադրբեջանը, Մակեդոնիան, Բոսնիա և Հերցեգովինան, Սերբիան, Ղազախստանը, Չեռնոգորիան, Մոլդովան, Հորդանանը, Ուկրաինան, Մավրիտանիան, Ալժիրը և Պակիստանը։ Նշվում է, որ զորավարժության ընթացքում դաշտային որևէ գործողություններ չեն իրականացվի։
Քառօրյա զորավարժությանը մասնակցում են Թուրքիայի զինված ուժերի 84 և հյուրընկալվող երկրների 48 զինվորականներ։ Հարկ է նաև նշել, որ REGEX-14-ն անցկացվում է ՆԱՏՕ-ի՝ Նապոլիում տեղակայված միացյալ հրամանատարության աջակցության ներքո։
Հավելենք, որ Հյուսիսատլանտյան ռազմական դաշինքին Թուրքիան անդամագրվել է 1952 թվականին։
Pingback: Ադրբեջանցի զինվորականները հոկտեմբեր-նոյեմբեր ամիսներին կմասնակցեն միջազգային մի քանի վարժանքների | Ռազմ.info