ՀՀ Ազգային ժողովում ընդունվել է օրենքի նախագիծը, որով ՀՀ և ՌԴ միջև միջպետական համաձայնագրերի շրջանակներում Հայաստանի զինված ուժերի համար բացառապես ռազմական նշանակության արտադրանքի ներմուծումն ազատվում է ավելացված արժեքի հարկից:
Նախագիծն ընդունվել է առաջին ընթերցմամբ՝ 89 կողմ, 0 ձեռնպահ և դեմ ձայներով:
Նշվում է՝ ՌԴ կառավարության Հայաստանին տրամադրած 200 մլն ԱՄՆ դոլարի արտահանման վարկի ու ՀՀ և ՌԴ կառավարությունների միջև միջպետական համաձայնագրերի շրջանակներում Հայաստանի զինված ուժերի համար ռազմական նշանակության արտադրանքի ներմուծման նկատմամբ ավելացված արժեքի գծով արտոնություններ սահմանված չեն:
Ըստ այդմ՝ հաշվի առնելով Հայաստանի զինված ուժերի համար ռազմական նշանակության արտադրանքի ներմուծման անհրաժեշտությունը և կարևորությունը՝ խնդիր է առաջանում համապատասխան իրավական դաշտի ապահովման տեսանկյունից Հայաստանի արտադրանքի ներմուծման նկատմամբ ավելացված արժեքի հարկի գծով արտոնության տրամադրման համար:
«Հայաստանի կողմից տվյալ բնագավառում իրականացվող քաղաքականությունն ուղղված է բարենպաստ պայմաններ ստեղծել Հայաստանի զինված ուժերի համար ռազմական նշանակության արտադրանքի ներմուծման համար»,—նշված է օրենքի նախագծում:
Նախագծի ընդունման արդյունքում ակնկալվում է ստեղծել համապատասխան իրավական դաշտ համաձայնագրերի շրջանակներում ՀՀ զինված ուժերի համար ռազմական նշանակության արտադրանքի ներմուծումն ավելացված արժեքի հարկից ազատելու համար: