Հուլիսի 4-ին Թուրքիայի հարավարևելյան Հաքքարի նահանգի Չուքուրջա գավառում «Քրդստանի աշխատավորական կուսակցության» (PKK) զինյալները նռնականետով կրակել են Թուրքիայի ուժայինների վրա, վիրավորվել է 3 զինծառայող: Այս մասին հայտնում է թուրքական պետական «Անադոլու» գործակալությունը:
Հաքքարի նահանգի մի քանի գավառներ հայտարարվել են անվտանգության հատուկ գոտիներ. (արխիվ)
Վիրավորված զինծառայողները տեղափոխվել են Հաքքարիի նահանգային հիվանդանոց: Ըստ թուրքական աղբյուրի՝ նրանց կյանքին վտանգ չի սպառնում:
Թուրքիայի ուժայինների և քուրդ զինյալների միջև բախումները ինտենսիվացել են 2017-ի գարնանից: Այդ բախումների հետևանքով երկու կողմերն էլ թե՛ նյութական, թե՛ մարդկային կորուստներ են ունենում: Բախումների հետևանքով գրեթե ամեն օր Թուրքիայի ուժային կառույցների զինծառայողներ են սպանվում: Միայն հունիսի 22-29-ին բախումների հետևանքով սպանվել է Թուրքիայի ԶՈւ 9 զինծառայող:
Թուրք-քրդական բախումները սկսվել են դեռևս 2015-ի ամռանից և արդեն երկու տարի է ինչ շարունակվում են: Բացի մարդկային կորուստներից, Թուրքիայի արևելքում և հարավարևելքում մի շարք նահանգներ նյութական կորուստներ են կրում, դրանցից մի մասը ավերակների է վերածվել: