Դաղստանում սպանվել են ահաբեկչական խմբավորման ղեկավարներ

Դաղստանի Բույնանսկի շրջանում ապրիլի 19-ի առավոտյան հայտարարվել էր հակաահաբեկչական գործողության ռեժիմ։ Ուժային կառույցի ներկայացուցիչները շրջափակել են տներից մեկը, որտեղ թաքնվել են զինյալներ։ Բանակցությունների արդյունքում տնից տարհանվել է երեխա։

Նկարը` ՏԱՍՍ լրատվական գործակալության

Արդեն երեկոյան հակաահաբեկչական գործողության ակտիվ փուլի ժամանակ հատուկ նշանակության ջոկատայինների գործողությունների ընթացքում սպանվել է 5 հոգի, որից 3-ը զինված խմբավորումների ղեկավարներ։ Այս մասին հայտնում է ռուսաստանյան «ՌԻԱ Նովոստի» լրատվական գործակալությունը՝ հղում անելով ՌԴ հակաահաբեկչական հանձնաժողովին։

Ավելի վաղ հաղորդվել էր, որ շրջափակման մեջ հայտնված զինյալների թվում է նաև ահաբեկչական «Իմարաթ Կավկազա» խմբի ղեկավար Ալիասհամ Քեբեկովը։

Հակաահաբեկչական հանձնաժողովը ավելի ուշ հաստատել է, որ  սպանվել է միջազգային զինված խմբավորման ղեկավար ազգությամբ ավար Ալիսահամ Քեբեկովը։

«Կովկասյան հանգույց» պարբերականն էլ իր հերթին հայտնում է, որ սպանվածների թվում է նաև Դաղստանի Ունցուկուլսկիի շրջանի զինյալների էմիր Շամիլ Հասանովը։  Սպանվածների թվում եղել են նաև Քեբեկովի և Հասանովի կանայք։

Նշենք, որ 2012թ. ապրիլից Քեբեկովը հետախուզվում էր։

Հավելենք, որ  ռուսաստանցի հայտնի գիտնական, կովկասագետ Ահմետ Յարլիկապովը  մտավախություն է հայտնել, որ ակաբեկիչների այս խմբի ոչնչացումը  կմեծացնի Հյուսիսային Կովկասում «Իսլամական պետություն» զինված խմբավորման ազդեցության գործոնը։

2015 թվականից մինչև օրս Դաղստանում իրականացված ահաբեկչական և հակաահաբեկչական գործողությունների մասին Ռազմինֆոն կազմել է ժամանակագրություն։