Ֆրանսիական Airbus Defence and Space ընկերության և ադրբեջանական «Ազերկոսմոս» ԲԲԸ-ի բանակցություններն ադրբեջանական կողմին SPOT-7 հետախուզական արբանյակի կառավարումը հանձնելու ուղղությամբ ավարտին են մոտենում։
Ինչպես հաղորդել է լրագրողներին Ադրբեջանի կապի ու բարձր տեխնոլոգիաների նախարար Ալի Աբբասովը, արդեն ավարտվում են աշխատանքները համապատասխան փաստաթղթերը կնքման պատրաստելու ուղղությամբ։ Նախարարի խոսքերով՝ ադրբեջանական կողմը հույս ունի արդեն 2014-ին ստանձնել արբանյակի կառավարումը։
Հիշեցնենք, որ SPOT-7 արբանյակը նախատեսված է Երկրի մակերևույթի զոդավորման համար։ Այն արձակվել է 2013-ի փետրվարին։ Պաշտոնական տվյալներով՝ արբանյակի գործարկումը հնարավորություն կտա առցանց բարձրորակ ու հստակ պատկերներ ստանալ Երկրի մակերևույթից։ Airbus Defence and Space ընկերության՝ պաշտպանական, տիեզերական հաղորդակցության և անվտանգության գծով ղեկավար Էբերթ Դուդոքի խոսքերով՝ այս օպտիկական արբանյակի գործարկումը թույլ է տալիս ընդլայնել գերմանական արտադրության TerraSAR-X (արձակվել է 2007-ի հունիսի 15-ին Բայկոնուրից) ու Tandem-X (արձակվել է 2010-ին) ռադարային արբանյակների հնարավորությունները։
Հավելենք, որ «Ազերկոսմոս» ԲԲԸ-ն ստեղծվել է Ադրբեջանի նախագահի հրամանագրով 2010-ի մայիսին։ ԲԲԸ-ի բոլոր բաժնետոմսերը պատկանում են Ադրբեջանի իշխանություններին։