Հոկտեմբերի 5-ին Ադրբեջանի զինված ուժերը վերջնականապես ավարտեցին Ռուսաստանից Գաբալայի ռադիոտեղորոշման կայանի ընդունման գործընթացը։ Իսկ ՌՏԿ-ի թեման շարունակում է սեպ մնալ ռուս-ադրբեջանական հարաբերություններում։
Ադրբեջանի ռազմաօդային ուժերի հրամանատար, գեներալ-մայոր Ալթայ Մեհդիևը հայտարարել է, որ կայանի տարածքում այլևս ռուս զինծառայողներ չկան, նրանց իրենց ընտանիքների հետ միասին լքել են Գաբալան, և ՌՏԿ-ն ամբողջությամբ Ադրբեջանի ԶՈւ վերահսկողության ներքո է։
Հիշեցնենք, որ «Գաբալա ՌՏԿ-ի կարգավիճակի, օգտագործման պայմանների ու սկզբունքների վերաբերյալ Ադրբեջանի ու ՌԴ կառավարությունների միջև համաձայնագիրը» կնքվել է 2002-ին։ Սկսած 2012-ի դեկտեմբերի 10-ից՝ ՌԴ-ն դադարեցրել է կայանի շահագործումը, քանի որ Ադրբեջանը պահանջել է չափից դուրս մեծ գումար վարձակալության դիմաց. նախկինում 14 մլն ԱՄՆ դոլարի փոխարեն՝ 300 մլն դոլար։
Գաբալայի ՌՏԿ-ն գործարկվել է 1985-ին, իսկ շինարարությունը սկսվել էր դեռևս 1976-ին։ Կայանը նախատեսված է Ասիայից և Հնդկական օվկիանոսի ավազանից արձակվող բալիստիկ հրթիռները հայտնաբերելու, ինչպես նաև հարավային հատվածի տիեզերական օբյեկտներին հետևելու համար: Կայանը հնարավորություն ունի հայտնաբերելու 300-ից 7200 կմ հեռավորության վրա գտնվող թիրախները:
ԽՍՀՄ փլուզումից հետո ՌՏԿ-ն գործում էր առանց իրավաբանական ձևակերպումների, և Ադրբեջանն անընդհատ պահանջում էր վճարել կայանի վարձակալության դիմաց՝ հակառակ դեպքում սպառնալով դադարեցնել դրա շահագործումը:
Հավելենք, որ Գաբալա ՌՏԿ-ի փոխարեն ՌԴ-ն ցանկանում է կիրառել Կրասնոդարի շրջանի Արմավիր քաղաքի «Վորոնեժ» տիպի ռադիոտեղորոշման կայանը։