Հունիսի 18-ին ՀՀ ԶՈւ ՀՕՊ զորքերում մեկնարկել է հակաօդային պաշտպանության համակարգի ամբողջական ընդգրկմամբ զորավարժություն: ՊԲ-ում զուգահեռ անցկացվում են ՀՕՊ ստորաբաժանումների ներգրավմամբ մարտական հրաձգությամբ զորավարժություններ:
Այս մասին հայտնում է ՀՀ ՊՆ կայքը:
Ներգրավվել են Ս-300, արդիականացված Ս-125, «Օսա-ԱԿ» և «Ստրելա-10» զենիթահրթիռային համալիրներ, «Իգլա-Ս» և «Վերբա» դյուրակիր ԶՀՀ-ներ, ինչպես նաև տեղական արտադրության նորագույն ռադիոլոկացիոն կայաններով սպառազինված ՀՕՊ ստորաբաժանումներ:
Զորավարժությունների նպատակն է համատեղ կիրառման հարցերի ներդաշնակումը, միասնական կառավարման համակարգերի, ռադիոլոկացիոն հետախուզության և զենիթային կրակի վարման արդյունավետության, ինչպես նաև մարտական հաշվարկների պատրաստության մակարդակի բարձրացումը: