Օգոստոսին 1-ին Կատարում մեկնարկել է այդ երկրի և Թուրքիայի զինված ուժերի համատեղ զորավարժությունը: Զորավարժությունը անցկացվելու է երկու փուլով՝ ցամաքային և ծովային: Այս մասին հայտնում է թուրքական NTV հեռուստաալիքի կայքը:
Ըստ աղբյուրի՝ զորավարժությանը թուրքական կողմից մասնակցելու է Կատարում տեղակայված Թուրքիայի ԶՈւ ռազմաբազայում ծառայող 250 զինծառայող և 30 միավոր զրահատեխնիկա:
Զորավարժության հայտարարված նպատակը Թուրքիայի և Կատարի զինված ուժերի գործողությունների համակարգումն է և փոխգործակցության ամրապնդումը: Ըստ թուրքական «Հյուրիեթ» պարբերականի՝ զորավարժությունը ավարտվելու է օգոստոսի 8-ին:
Նշենք, որ զորավարժության ծովային փուլին մասնակցելու համար Թուրքիան Կատար է ուղարկել նաև ռազմածովային ուժերի TCG Gökova ֆրեգատը՝ 214 զինծառայողով: Թուրքիայի և Կատարի նավատորմերի համատեղ վարժանքները անցկացվելու են Համադ նավահանգստում, Դոհայում տեղակայված ՌԾՈւ ռազմաբազայում և Կատարի ջրային տարածքներում:
Կատարում թուրքական ռազմաբազայի տեղակայման գործընթացը սկսվել է դեռևս 2015-ին՝ երկու երկրների միջև կնքված ռազմական կրթության, ռազմական արդյունաբերության և Կատարում թուրքական ռազմաբազա տեղակայելու մասին պայմանագրի շրջանակներում:
Երկու երկրների կառավարությունների միջև Կատարում թուրքական զորախումբ տեղակայելու վերաբերյալ իրականացման համաձայնագիրը» (implementation agreement) կնքվել է 2016-ի ապրիլին: 2017-ի հունիսին այդ համաձայնագիրը վավերացրել են Թուրքիայի խորհրդարանը և նախագահը, ինչից հետո էլ հնարավոր է դարձել զորախմբի տեղակայում:
Հատկանշական է, որ թուրքական կողմը հապճեպ կարգով վավերացրեց այդ պայմանագիրը, այն բանից հետո, երբ արաբական մի շարք երկրներ խզեցին իրենց դիվանագիտական հարաբերությունները Կատարի հետ՝ վերջինիս մեղադրելով ահաբեկչական խմբավորումներին աջակցելու համար:
Կատարի հետ դիվանագիտական հարաբերությունները խզել են Եգիպտոսը, Սաուդյան Արաբիան, ԱՄԷ-ն, Բահրեյնը, Եմենը, Լիբիան, Մալդիվները, Կորոմյան կզղիները, Սենեգալը, Մավրիտանիան: Կատարի հետ դիվանագիտական հարաբերությունների մակարդակը իջեցրել են Ջիբութին, Հորդանանը, Չադը, Նիգերը: