Հունիսի 27-ին Թուրքիայի հարավարևելյան Շրնաք նահանգի Ուլուդերե գավառում «Քրդստանի աշխատավորական կուսակցության» (PKK) զինյալները կրակել են ժանդարմերիայի զինծառայողների վրա: Արդյունքում վիրավորվել, այնուհետև հիվանդանոցում մահացել է 3 զինծառայող: Այս մասին հայտնում է թուրքական պետական «Անադոլու» գործակալությունը:
Թուրքական ուժայինները երկրի հարավարևելյան Շրնաք նահանգում գործողություններ են իրականացնում քրդերի դեմ. արխիվ
Զինծառայողները ժանդարմերիայի հատուկ նշանակության գումարտակին կից զորամասին սննդամթերք տանելիս են եղել: Միջադեպից հետո PKK-ի զինյալներին գտնելու համար Թուրքիայի ուժային կառույցները ռազմական գործողություններ են սկսել Ուլուդերե գավառում:
Մեկ այլ միջադեպի ժամանակ՝ հունիսի 28-ին, Թուրքիայի հարավարևելյան Հաքքարի նահանգում PKK-ի դեմ ժանդարմերիայի և ոստիկանական ուժերի համատեղ գործողությունների ժամանակ սպանվել է 1 ոստիկան: Փոխանցում է «Անադոլու» գործակալությունը:
Թուրքիայի ուժայինների և քրդերի միջև բախումները կրկին ինտենսիվացել են 2017-ի գարնանից սկսած: Բախումներն ուղեկցվում են երկուստեք մարդկային և նյութական կորուստներով: Վերջին 3-4 օրում բախումների հետևանքով թուրքական բանակի կորուստների թիվը հասել է 6-ի:
Ըստ թուրքական պետական «Անադոլու» գործակալության՝ միայն հունիսի 15-22-ին PKK դեմ գործողություններում սպանվել է Թուրքիայի ուժային կառույցների 10 զինծառայող, ևս 36-ը վիրավորվել է:
2 տարի շարունակվող բախումների հետևանքով Թուրքիայի արևելյան և հարավարևելյան մի շարք նահանգներ ավերակների են վերածվել, տեղահանվել է 350-500 հազար մարդ: