Այսօր՝ օգոստոսի 21-ի առավոտյան, ԱՄՆ ռազմածովային ուժերի 7-րդ նավատորմի «Ջոն ՄաքՔեյն» ռազմանավը Սինգապուրի ափերի մոտ բախվել է այդ մասում նավարկող առևտրային նավի: Այս մասին հայտնում է ԱՄՆ ՌԾՈւ 7-րդ նավատորմի մամուլի ծառայությունը:
ԱՄՆ ռազմածովային ուժերի 7-րդ նավատորմի «Ջոն ՄաքՔեյն» ռազմանավը
Բախման հետևանքով ռազմանավի մի հատվածը ջրասույզ է եղել, սակայն նավաստիները կարողացել են ռազմանավն ինքնուրույն հասցնել Սինգապուրի ռազմածովային բազաներից մեկը:
Միջադեպի հետևանքով ռազմանավի 5 նավաստի վիրավորվել է, ևս 10 զինծառայող հայտարարվել է անհետ կորած: Վիրավորներից չորսը հոսպիտալացվել են Սինգապուրում:
Կորած զինծառայողներին փնտրելու համար ամերիկյան կողմից ներգրավվել են ուղղաթիռներ և Osprey կոնվերտոպլան: Որոնողական աշխատանքներին մասնակցում են նաև Սինգապուրի ռազմաօդային և ռազմածովային ուժերի զինծառայողներ:
Միջադեպին արձագանքել և իր մտահոգությունն է հայտնել նաև ԱՄՆ նախագահը:
Thoughts & prayers are w/ our @USNavy sailors aboard the #USSJohnSMcCain where search & rescue efforts are underway. https://t.co/DQU0zTRXNU
— Donald J. Trump (@realDonaldTrump) August 21, 2017