ՀՀ որոշ քաղաքացիների՝ մարտական հերթապահությունում չընդգրկվելու արտոնությունը չի ենթադրում, որ զորամասի՝ ռազմական գործողությունների մեջ ներքաշվելու դեպքում զինծառայողը չի ներգրավվելու զորամասի կողմից իրականացվող մարտական խնդրի կատարման մեջ: Այս մասին ՀՀ ՊՆ «Հայ զինվոր» պաշտոնաթերթի հետ զրույցում հայտնել է ՊՆ իրավաբանական վարչության պետ Սասուն Սիմոնյանը:
Նշենք, որ ՀՀ ՊՆ ներկայացրած օրենքի նախագծերից մեկով վերացվում է հատուկ արտոնություններով քաղաքացիների համար 150 կմ շաղավիղում ծառայություն անցնելու պահանջները: Դրա փոխարեն տվյալ արտոնություններից օգտվող զինծառայողները իրավունք են ստանում մարտական ծառայության ներգրավվել միայն կամավոր հիմունքով: Ավելի մանրամասն՝ այստեղ:
Եթե անգամ վիճակահանությամբ արտոնություն ունեցող քաղաքացին հայտնվի մարտական հերթապահություն իրականացնող զորամասում, ըստ Վիգեն Սարգյանի, այսուհետ նա մարտական հերթապահության մեջ կներգրավվի միայն կամավոր ցանկության դեպքում:
«Զորակոչիկի կամքին հակառակ նրան մարտական հերթապահությունում ընդգրկելը կորակվի որպես ոչ իրավաչափ գործողություն` համապատասխան հետևանքներով», — նշել է Սասուն Սիմոնյանը:
ՊՆ իրավաբանական վարչության պետի խոսքով՝ զինծառայողը կարող է իր ցանկությամբ մարտական հերթապահություն անցկացնել, օրինակ եթե ցանկանում է օգտվել օրենսդրությամբ մարտական հերթապահությունում ընդգրկողների համար սահմանվող որոշ արտոնություններից: Մասնավորապես` մարտական հերթապահություն անցած զորացրված զինծառայողը բուհ-ի վճարովի համակարգում սովորելիս օգտվում է վարձավճարի 30 տոկոս զեղչի իրավունքից: