Կանադայի ու ԱՄԷ-ի համատեղ Streit Group ու ուկրաինական АвтоКрАЗ («ԱվտոԿռԱԶ») ընկերությունները ներկայացրել են StreitGroup-ի Spartan (Սպարտան) ու Cougar (Կուգար) զրահամեքենաները, որոնք հավաքվել են ուկրաինական ընկերության գործարաններում, հայտնում է ռուսաստանյան «Ռազմավարության ու տեխնոլոգիաների ուսումնասիրության կենտրոնի» բլոգը:
Ուկրաինայում արտադրված ու ազգային գվարդիային տրվող Սպարտան (առջևից) ու Կուգար (հետևից) զրահամեքենաները
Ուկրաինայի նախագահ Պյոտր Պորոշենկոյի՝ ազգային գվարդիայի զորավարժարան այցելության ժամանակ երկու նոր զրահամեքենաները հանձնել են ազգային գվարդիայի ստորաբաժանումներին, որոնք մեքենաները կօգտագործեն երկրի հարավ-արևելքում ընթացքող մարտերում:
Նշենք, որ նախագահի այցի ժամանակ գվարդիականներին են հանձնվել նաև ԲՏՌ-3 զրահափոխադրիչների տարբեր արդիականացումներ, ինչպես նաև Տ-64Բ1Մ տանկ, որը նոր է արդիականացվել:
Ավելացնենք, որ նշված համալրումների արդյունքում Ուկրաինայի ազգային գվարդիան ստացավ ևս մեկ տեսակի զրահապատ մեքենաներ, որոնք պիտի օգտագործվեն ԲՏՌ-3, ԲՏՌ-4, Դոզոր-Բ ու այլ զրահապատ մեքենաների հետ, ինչը, իհարկե, կդժվարացնի դրանց բոլորի շահագործումը, քանի որ ամեն նոր մեքենայի հետ անհրաժեշտ է լինելու նոր ենթակառուցվածք, մասնագետներ և այլն:
Նշենք, որ StreitGroup-ի Սպարտան ու Կուգար մեքենաները MRAP դասի են, ինչը նշանակում է, որ ավելի պաշտպանված են ականներից ու այլ պայթուցիկ սարքերից: Մեքենաների վրա տեղադրված է նաև սպառազինություն, մասնավորապես գնդացիրներ, ինչպես նաև ավտոմատ նռնականետներ: