Տվյալ պահին հայկական մի շարք զորամասերի մշտական տեղակայման վայրերը փոփոխվում են և նոր տեղում անհրաժեշտ ենթակառուցվածք է ստեղծվում, այդ թվում անձնակազմի կեցության և ծառայության կազմակերպման համար։
Այս մասին տեղեկանում ենք ՀՀ ՊՆ մամուլի խոսնակ Շուշան Ստեփանյանի ֆեյսբուքյան էջից։ Պատճառը ՀՀ, Ադրբեջանի և Ռուսաստանի նախագահների եռակողմ հայտարարության դրույթներ են, համաձայն որի հայկական զինուժը պետք է դուրս բերվի Արցախի մի շարք շրջաններից։
ՊՆ պարզաբանման մեջ ասվում է նաև, որ չնայած եռակողմ համաձայնագրով հաստատված հրադադարին, զինված ուժերի ողջ անձնակազմը շարունակում է կատարել իր առջև դրված խնդիրները։
Պաշտպանության նախարարությունը նաև հավաստիացնում է, որ իրադրության լիարժեք կայունացումից հետո կարվի հնարավորը՝ մարտական գործողություններին մասնակցած զինծառայողներին արձակուրդ տրամադրելու համար։