Օգոստոսի 10-ին Թուրքիայի արևելյան Բինգյոլ նահանգի Գենչ գավառում Թուրքիայի ուժայինների և «Քրդստանի աշխատավորական կուսակցության» (PKK) զինյալների բախումներում վիրավորվել է 2 զինծառայող, որոնցից մեկը ավելի ուշ մահացել է հիվանդանոցում: Այս մասին հայտնում է թուրքական պետական «Անադոլու» գործակալությունը:
Գավառում քուրդ զինյալների դեմ գործողությունները շարունակվում են:
Միևնույն ժամանակ Թուրքիայի ուժայինները շարունակում են գործողությունները PKK -ի դեմ Թուրքիայի այլ նահանգներում՝ Շրնաքում, Սղերթում (Սիիրթ):
Սղերթ նահանգում Թուրքիայի ժանդարմերիայի և անվտանգության գլխավոր տնօրինության (ոստիկանության) համատեղ գործողություններին աջակցում է նաև թուրքական օդուժը: Օգոստոսի 11-ին օդուժի կործանիչները հարվածել են քուրդ զինյալների դիրքերին նահանգի Բայքան գավառում, «շարքից հանվել է» PKK-ի 3 զինյալ: Հայտնում է «Անադոլու» գործակալությունը:
Օգոստոսի 10-ին Շրնաք նահանգում ժանդարմերիայի 23-րդ սահմանապահ դիվիզիայի հրամանատարության գլխավորությամբ գործողության ընթացքում «շարքից հանվել է» PKK-ի 5 զինյալ:
Թուրք-քրդական բախումները վերսկսվել են 2015-ի ամռանից: Բախումների հետևանքով մի շարք բնակավայրեր ավերվել են, տարբեր տվյալներով 350-500 հազար մարդ էլ տեղահանվել է: