Ապրիլի 11-ին Հայաստանի արտակարգ իրավիճակների նախարարն ընդունել է Հայաստանում Իրանի դեսպանին և ի թիվս այլ հարցերի՝ քննարկել է նաև երկու երկրների համապատասխան կառույցների միջև փորձի փոխանակման ու համատեղ վարժանքների հնարավորությունները: Այս մասին հայտնում է ՀՀ ԱԻՆ կայքը:
Հանդիպման նպատակն էր քննարկել արտակարգ իրավիճակների և աղետների ռիսկերի նվազեցման ու կանխարգելման ոլորտում հայ-իրանական համագործակցության ծավալների ընդլայնումը:
Իր խոսքում նախարար Դավիթ Տոնոյանը կարևորել է Հայաստանի և Իրանի համատեղ գործունեության դերակատարումը Հարավային Կովկասի տարածաշրջանում աղետների ռիսկի նվազեցման և կանխարգելման հիմնախնդրում՝ նշելով նաև Իրանի Կարմիր մահիկի ներգրավածության կարևորությունը՝ հատկապես Հայաստանի սահմանամերձ գոտիներում իրականացվող աշխատանքներում:
Հանդիպման ավարտին պայմանավորվածություն ձեռքբերվեց նաև համատեղ աշխատանքներ իրականացնել ճգնաժամերին արձագանքելու անդրսահմանային մեխանիզմներ մշակելու ուղղությամբ: