ՀՀ ԱԻ նախարարությունում անցկացված միջոցառման նպատակն էր կրկին բարձրաձայնել ականային վտանգի մասին, գործընկեր և շահագրգիռ կազմակերպություններին ներկայացնել հումանիտար ականազերծման առումով Հայաստանում առկա իրավիճակը: Այս մասին հայտնում է ՀՀ ԱԻՆ կայքը:
«Օրվա խորհրդին համահունչ՝ հանդիպումը նպատակ ունի ականազերծման ոլորտում համագործակցության նոր մեկնարկ տալ, քննարկման արդյունքում ձևավորել այն հարթակը, որը կհանդիսանա հիմնական անելիքների սկզբնատեղին», — իր խոսքում նշել է ՀՀ ԱԻ նախարար Դավիթ Տոնոյանը:
«Հումանիտար ականազերծման և փորձագիտական կենտրոն» ՊՈԱԿ-ի տնօրեն Ռուբեն Առաքելյանը զեկուցել է իրենց կողմից Հայաստանում տարվող աշխատանքի և ապագա ծրագրերի մասին, որոնք ներառում էր համագործակցություն ինչպես Արտակարգ իրավիճակների նախարարության, այնպես էլ՝ այլ գերատեսչությունների հետ:
Քննարկելով բնակչության պաշտպանության համատեքստում հումանիտար ականազերծման խնդիրներն ու միջազգային և տեղական կազմակերպությունների հետ համագործակցության հեռանկարները՝ ներկաներն առաջ են քաշել ոլորտում առկա հիմնական խնդիրներն ու առաջնային լուծում պահանջող հարցերը:
ԱԻ նախարար Դավիթ Տոնոյանը շեշտել է, որ ոլորտի կարողությունների և հագեցվածության առումով նկատելի առաջընթաց կա, սակայն լուրջ անելիքներ կան սահմանամերձ համայնքների բնակչության իրազեկվածության ուղղությամբ: