Նվազագույնը 58 մարդ է սպանվել Սիրիայի հյուսիսարևմուտքում ընդդիմադիր ուժերի վերահսկած Խան Շեյխուն քաղաքում քիմիական գազի կիրառման հետևանքով: Այս մասին հայտնում է BBC լրատվակայքը՝ հղում անելով «Սիրիայում մարդու իրավունքների դիտարան» (Syrian Observatory for Human Rights) բրիտանական կազմակերպությանը:
Ըստ կազմակերպության՝ ավիահարվածները ամենայն հավանականությամբ իրականացրել է Սիրիայի կառավարական բանակը:
Reuters գործակալությունը փոխանցում է, որ Սիրիայում ռազմական աղբյուրը կտրականապես հերքել է, որ կառավարական բանակը նմանատիպ զենք է կիրառել: Ռուսաստանի ՊՆ-ն հայտնել է, որ ապրիլի 4-ին շրջանում հարվածներ չի իրականացրել:
Նշենք, որ 2013-ի հոկտեմբերից Սիրիան անդամակցել է քիմիական զենքի կիրառումն արգելող Կոնվենցիային, որին հետևել էր երկրի տարածքում առկա քիմիական զենքի պաշարների հայտարարագրումը։ Համաձայն այդ տվյալների՝ Սիրիան ուներ շուրջ 1300 տոննա քիմիական զենք, որը պարտավորվել էր ոչնչացնել։