Մարտի 29-ին «Իսլամական պետություն» ահաբեկչական խմբավորման զինյալները կրակել են Եփրատ գետի վրա Տաբկայի ջրամաբարի մոտ տեղակայված ԱՄՆ աջակցությամբ գործող «Սիրիայի դեմոկրատական ուժերի» ուղղությամբ: Այս մասին հայտնում է Reuters գործակալությունը:
Վերահսկողության գոտիները Սիրիայի Տապկայի ջրամբարի շրջանում (27 մարտի 2017թ. դրությամբ). քարտեզը՝ «Ալ Ջազիրայի»
Կրակոցների արդյունքում կորուստներ չկան, սակայն Տաբկայի ջրամբարի ամրացման աշխատանքներ իրականացնող ինժեներները ստիպված են եղել տարհանվել: ԻՊ զինյալները կրակել են ջրամաբարի հարավային հատվածից, որը դեռևս գտնվում է նրանց վերահսկողության ներքո: Սակայն որոշ ժամանակ անց Տաբկայի ջրամաբարի մոտ վերակագնողական աշխատանքները վերսկսվել են:
Հիշեցնենք, որ մարտի 27-ին արաբներից, քրիստոնյաներից և գլխավորապես քրդերից կազմված «Սիրիայի դեմոկրատական ուժերը» վերահսկողություն են հաստատել Սիրիայի խոշորագույն ջրամբարի մի հատվածի վրա, ինչպես նաև ԻՊ-ից գրավել են Տաբկայի ավիաբազան:
Տաբկայի ռազմաբազան Սիրիայի և Իրաքում «Իսլամական պետության» «մայրաքաղաքը» համարվող Ռաքքա քաղաքից շուրջ 45 կմ հեռավորության վրա է և կարևոր ռազմավարական դիրք ունի, ինչն էլ կօգնի Ռաքքայի ազատագրման գործողությունների ժամանակ:
Նշենք, որ վերջին շրջանում «Իսլամական պետությունը» կորցնում է Սիրիայում և Իրաքում իր վերահսկած տարածքների մեծ մասը: Սիրիայում ներկայում նրանք վերահսկում են խոշոր քաղաքներից միայն Ռաքքան: Իրաքի Մոսուլ քաղաքում իսլամիստների վերահսկողության տակ մնացել է միայն մի փոքր հատված: