Սիրիայում և Իրաքում ԱՄՆ գլխավորած միջազգային կոալիցիայի և Ռուսաստանի ավիահարվածներից մահացածների մոնիթորինգով զբաղվող Airwars.org կայքը հրապարակել է տվյալներ, ըստ որոնց՝ միայն մարտ ամսին կոալիցիայի ավիահարվածներից Սիրիայում և Իրաքում մահացել է շուրջ 1000 մարդ: Այս մասին փոխանցում է «Al Masdar News» լրատվակայքը:
Մարտի 17-ին Իրաքի Մոսուլ քաղաքի արևելքում ԱՄՆ գլխավորած միջազգային կոալիցիայի ավիահարվածներից սպանվել էր ավելի քան 200 մարդ, որոնց հիմնական մասը՝ քաղաքացիականներ: Կոալիցիան սկսել է հետաքննություն:
Իսկ մարտի 16-ին, Սիրիայի Իդլիբի նահանգում ապստամբների ձեռքում գտնվող Ալ-Ջինահ գյուղի մզկիթում ավիահարվածից զոհվել էր ավելի քան 40 մարդ, վիրավորվել՝ ավելի քան 100 մարդ: Զոհերի մեծ մասը քաղաքացիական էր: Ծանր վիրավորներով պայմանավորված՝ հնարավոր էր զոհերի թվի աճ, իսկ որոշները գտնվում էին փլատակների տակ:
Դեռ պարզ չէր, թե ով է ավիահարվածի հեղինակը: Սակայն նույն ժամանակահատվածում ԱՄՆ-ն հարվածներ էր իրականացրել տեղանքում: Միացյալ Նահանգները հայտարարություն է տարածել, որ իրենք չեն թիրախավորել մզկիթը, այլ հարվածել են մզկիթից 15 մ հեռավորության վրա գտնվող կառույցին, որտեղ հավաք էին անում Ալ-Կաիդայի զինյալները:
Մարտի 21-ին կոալիցիան ավիահարվածներ է հասցրել Ռաքքայի մոտ գտնվող դպրոցին, որտեղ պատսպարված էին իրենց տները լքած քաղաքացիականներ: Սպանվել է ավելի քան 30 մարդ: Կոալիցիան հետաքննություն է սկսել:
Հիշեցնենք, որ մարտի 22-ին Վաշինգտոնում ԱՄՆ գլխավորած միջազգային կոալիցիայի անդամ 68 պետության ԱԳ նախարարներ հավաքվել էին՝ քննարկելու «Իսլամական պետություն» ահաբեկչական խմբավորման դեմ պայքարը: Հանդիպումը անցկացրել էին ԱՄՆ գլխավորած միջազգային կոալիցիայի անդամները, այն առաջինն էր Դոնալդ Թրամփի՝ ԱՄՆ նախագահ ընտրվելուց ի վեր:
Հանդիպման ընթացքում ԱՄՆ պետքարտուղարը հայտնել էր, որ ԱՄՆ-ն մտադիր է Սիրիայում և Իրաքում ուժեղացնել ճնշումը Ալ-Կաիդայի և «Իսլամական պետության» վրա, այնտեղ ստեղծել «կայունության և զինադադարի շրջաններ», որպեսզի փախստականները կարողանան վերադառնալ տուն:
ԱՄՆ գլխավորած միջազգային կոալիցիան կազմավորվել է 2014-ի սեպտեմբերին, այն բանից հետո, երբ «Իսլամական պետությունը» 2014-ի հունիսի կեսերին հաշված օրերի ընթացքում կարողացավ Իրաքի բանակից գրավել մեծությամբ երկրորդ քաղաք Մոսուլը։