Ստեղծվելուց հետո մեկ տարվա ընթացքում Ռուսաստանի ազգային գվարդիան պայքար է մղել Հյուսիսային Կովկասում ապօրինի զինված խմբավորումների դեմ, ոչնչացրել է 125 զինյալ և նրանց 300 ճամբար: Այս մասին հայտնում է ռուսաստանյան «ՌԻԱ Նովոստի» գործակալությունը:
Ռուսաստանի ազգային գվարդիայի զորքերի ստորաբաժանումը զորավարժության ժամանակ
Գվարդիայի հատուկ նշանակության ստորաբաժանումները տարվա ընթացքում չեզոքացրել են Ռուսաստանում գործող 80 զինված խմբավորում, ձերբակալել են 15 հազարից ավելի մարդու:
Գործակալության տվյալներով՝ գվարդիան ունի 340 հազարանոց անձնակազմ, որի մեծ մասը ներգրավվել է ՆԳՆ կազմից: Գվարդիայի կազմի մեջ են մտցվել Ռուսաստանի ներքին զորքերը, հատուկ նշանակության արագ արձագանքման և այլ ստորաբաժանումներ:
Այս կազմակերպությունը, բացի Հյուսիսային Կովկասում հակաահաբեկչական գործողությունների մասնակից լինելուց, նաև փաստացի հակակշիռ է հանդիսանում Ռուսաստանի բանակի համար՝ թույլ չտալով, որ բանակի ղեկավարության ձեռքում անվերահսկելի մեծ ուժ կենտրոնանա: Գվարդիան նաև զորավարժություններ է անցկացնում բանակի ստորաբաժանումների հետ:
Այս տարվա մարտին հայտնի է դարձել, որ գվարդիայի զորքերը ներգրավվելու են Հյուսիսային Կովկասում հակաահաբեկչական գործողություններ իրականացնող միացյալ զորախմբի կազմ։
Միևնույն ժամանակ գվարդիան նույնպես թիրախ է դարձել Հյուսիսային Կովկասում գործող զինված կազմավորումների համար: Մարտի 24-ի առավոտյան զինյալները հարձակվել են Չեչնիայում ռուսական գվարդիայի զորամասի վրա, ինչի հետևանքով սպանվել է 6 ռուսաստանցի զինծառայող: Ահաբեկչության փորձին մասնակցել է 8 զինյալ, որոնք բոլորը սպանվել են: